رُفعَ الستار و Xiaomi  قدّمت البارح 28 ديسمبر، الإصدار الجديد متاع هواتفها Mi 11 وإلّي هو أول هاتف بشريحة Snapdragon 888 !

كنت حكيتلكم على مميزات الشريحة هذي هنا وقلنا باللي هي باش تكون أهم مكوّن تقني في هواتف 2021.

Mi 11 يجي بديزاين مزيان، خفيف، وبأقل سمك من الإصدارات السابقة وبمميزات تقنية واعدة. (كومنتس)

والجديد زادا، شاومي قدّمت نظامها المتوافق مع التاليفون الجديد MIUI 12.5 إلي مرتكز على نظام أندرويد 11 وإلّي قدمت فيه الجديد خاصة 

– MIUI+ إلي يسهّل الوصول لمحتوى الهاتف من خلال شاشة الحاسوب

– أكثر تحويرات لتعزيز حماية النظام والمعطيات الشخصية

خلاف هذا النظام الجديد ما يستهلكش برشا شارج وأخف ب20÷ مالنظام القديم.

وما انجّمش نختم ونخليها في قلبي، آي نعم شاومي تبّعت آبل وباش تقترح 2 باكوات لنفس الهاتف بنفس السوم، واحد فيه شاحن والاخر لا وباش تخلي المستهلك هو يقرر أناهو إلي يساعدو. وعلما زادا باللي الفيديو الساخر من « آيفون بلاش شارجور » مازال موجود على صفحاتها في مواقع التواصل.