وحده من الشركات إلي تتعامل معاهم Apple كانت عرضة لـ ransomeware تسبّب في إفشاء برشا معلومات مهمّة، والقراصنة يطالبوا بفدية باش ما يتمّش تسريب المعلومات.

Quanta Computer Inc. هي شركة تايلندية من بين حرفائها نلقاو Apple, Google, HP… تعرضت لهجمة رقمية من قبل قراصنة روس تابعين لشركة REvil. الشركة هذي تقدّم في خدماتها في شكل Ransomeware-as-a-Service RaaS وتعاون في حرفائها في تطوير البرمجيات الخبيثة وتسهيل عمليات دفع الفدية. مجموع القراصنة إلي أسّسوا REvil ابتكروا طريقة جديدة في ما يخص القرصنة سماوها double-extorsion تتمثل في مرحلة أولى: تثبيت الـ ransomeware عند الضحية باش بعد ينجموا يبتزّوهم ويطلبوا منهم فلوس، وفي مرحلة ثانية: ينشروا جزء من المعلومات السريّة في موقعهم Happy Blog على الداركْ واب وهذا الكل باش يلزّوا الضحية إنها تدفع فدية أخرى مقابل المعلومات المسروقة.

الابتزاز إلي صار على شركة Quanta كان فاشل وردّت عليهم الشركة باللي هي فاقت بالثغرة الأمنية في سرفوراتها وبلّغت حرفائها وهوما تو مسؤولين، على ذاكا جماعة REvil صعّدوا في ابتزازهم ونشروا بعض الوثائق التقنية لتصنيع MacBook M1 الجديد ووجّهوا خطابهم لآبل وطالبوهم بدفع 50 مليون دولار كفدية قبل 1 ماي.

شخصيا نتصوّر باللي الحادثة هذي تنجم تأثّر على المشاريع المستقبلية لآبل لكنها ماهيش باش تدفع الفدية باش ما تساهمش في تمويل الجريمة الإلكترونية وخاصة، تحل الأبواب لبقية مجموعات القراصنة إنهم يستهدفوا شركات التصنيع إلي عندها حرفاء من العيار الثقيل.