المفروض اليوم يبدا العمل بالإجراءات الجديدة متاع Whatsapp  أما الجماعة خذاوْ في خاطرهم من الخوضة إلي صارت وأجلوها لـ 15 ماي 2021.

الحكاية بدات أوّل الشهر إلي فات، وقت إلي هبط بلاغ من عند Whatsapp قالوا فيه بإلّي باش يبرتاجيو مع فايسبوك شوية معلومات شخصية للمستعملين خلي يدوروا الدولاب. هي حكاية مشاركة المعلومات مش جديدة، لكن بين التخيير والإجبار هنا صلب الموضوع إلي لازمنا نحكيوْ فيه خاطر واتسآب جات بمنطق « أشرب وإلا طيّر ڨرنك ».

قامت القيامة وولاّت فما برشا إتهامات آش خلّى واتسآب يأجل البدأ في القرارات الجديدة حتى يفهّم الناس شنوا باش يعمل بالضبط بمعطياتهم واعتبر باللي فما برشا معلومات خاطئة قاعدة إدور.

في أكثر من منشور، واتسآب بينوا باللي المعطيات تشمل الإسم، الصورة، موقعك الجغرافي، IP …. وخاصة أي حاجة تخص نشاطك في التطبيق وتواصلك مع أي واحد يبيع في منتوج معين، بلغة أخرى تابع Whatsapp business.

تي ماهو خنرجع بيك لأكتوبر إلي فات وين أعلن واتسآب على إمكانية الشراء طول من خلال التطبيق وكانت أول تجربة فاشلة في البرازيل. 

هذا وأكدت واتسآب، بعد ما هاجروا برشا مستعملين ل Signal إنو المحادثات الكلها مشفّرة (آي أما الجديد فالحكاية إنها باش تتسجل على سرفورات فايسبوك وعلى ذاكا الأوروبيين سلكوها خاطر RGPD يمنع هذا)

يعني ملخر، كانك تستعمل في واتسآب شتحكي مع صحابك وتبعث لخواتك تصاور وتحكي مع أقاربك… لواه خايف وقت إلي معلوماتك الكل مقسمة هنا وغادي؟