Trump قبل ما يخرج، خلّى هدية لبعض المؤسسات الصينية. الهدية هذي تتمثل في إدراجهم ضمن القائمة السوداء Entity List ومن بين المؤسسات هذي Xiaomi وهكا وصل عدد الشركات الصينية في القائمة هذي +60 شركة من جملة 86.
لأحباء البراند هذا، ما تخافوش، صحيح الحكاية تفكرنا في الإجراءات الصارمة ضد Huawei و ZTE، لكن بالنسبة لـ Xiaomi الإجراءات تتمثل في :
منع التمويل الأمريكي ليها والمستثمرين الأمريكان لازم يجبدوا فلوسهم قبل ما يوفى العام. ومش كيف هواوي، شاومي تنجم تقعد تتعامل وتستعمل في المنتوجات الأمريكية.
لكن كان الضربة جات خفيفة لشاومي، ماكانتش هكا لوحدة من أكبر شركات تصنيع ال drones : DJI الشركة هذي مستقبلا ما عندهاش الحق تتعامل لا من قريب ولا من بعيد مع أي شركة أمريكية…
وفما زادا شركة SMIC الرائدة في صناعة الشرائح كانت ضحية قرار حكومة ترامب.
تهمة الشركات هاذم الكل : قربهم من الحكومة الصينية وسرقتهم لمعطيات تنجم تهدّد أمن الدولة.
شكون الصحيح وشكون الغالط؟ مش هذا جوهر الموضوع عندي، لكن نشوف باللي الحرب التكنولوجية وحرب المعلومات مهمّة ولازم الدول الكل يبداو واعين بيها !
The original article was posted on LinkedIn
