« just setting up my twttr »

هذا أول تويت هبط على Twitter ومولاه حطّو في المزاد العلني للبيع كانك تحب تشري ! 

آي نعم، جاكْ دورسي مولى تويتر حط أول تويت في المزاد العلني على الموقع المختص في بيع الآثار الرقمية، إن صح التعبير، Valuables.

أعلى سوم وصل لـ 2.5 مليون دولار. وكانك تحب تشري تويت آخر تنجم تتصفح البلاتفورم وتختار وفما زادا كل ما يخص digital art

كيف الميمز والفيديوات… وإلي باش يسئل « علاش يشريو في حاجات هكا؟ » الإجابة تكون لنفس السبب إلي تخلّي ناس تشري حاجات ذات قيمة (القيمة تختلف من شخص إلى آخر).

لكن يقول القايل، كي واحد يحط برشا فلوس في حاجة مادية باش تولّي ليه، لكن تصويرة أو تويت أو فيديو كيفاش تصير الحكاية؟

الإجابة هنا ساهلة، على خاطر بفضل التكنولوجيا وبالتحديد تقنية NFT كي تشري أثر رقمي تنتقل ليك الملكية الرقمية وتولي إنتي المالك.

باهي، من غير ما ندخلوا في برشا تفاصيل تقنية، تقنية ال NFT يستعملوها في مبادلات العملات الرقمية وتو توسع مجال استعمالها وأدرجوها في عمليات بيع وشراء الفنون الرقمية. 

حاليا في أمريكا الحكاية هذي قاعدة تاخو في صدى كبير، مع الأشياء المادية (نسخة محدودة من حاجة) والأشاء غير المادية (كل ما يخص DigiArt) وعالميا مازالوا يتستيو فيها. وفي تونس نتصورها تكون حل ناجع كان الفنان يوصل يبيع فنو للخارج !