بين الأزمة العالمية للشرائح الإلكترونية والأعطاب التقنية، شركة تيسلا قاعدة تتعدّى بفترة دقيقة !
✔️ الأعطاب التقنية
نهار 19 نوفمبر إلي فات، برشا مستعملين لسيارة تيسلا ما نجموش يحلو الكرهبة ويسوقوها. والسبب؟ السرفور طاح
هات نفهمو حاجة، فما 3 طرق باش تحل كرهبة تيسلا
– كارطا RFID تحطها حذا الباب
– مفتاح يتباع حسب الرغبة
– تطبيق في الهاتف كي يتعرّف عليك يحل الكرهبة (حل عملي وساهل )
المشكلة كانت وإنو التطبيق ما نجمش يتربط بالسرفور ياخي المستعملين عداو سوايع قبل ما تتحل المشكلة.
✔️ أزمة الشرائح الإلكترونية
كيف ما كنت حكيت قبل، الأزمة هذي عالمية وبرشا مصنّعي كراهب تشكاو من حدّتها. ولو إنها BMW أعلنت حرفائها وإنها باش تليفري الكراهب بلاش الشاشة التاكتيلْ، تيسلا فاجئت حرفائها كي ليفراتلهم كراهب من غير USB ports. صحيح الحاجة هذي ثانوية لكن غياب التواصل والإعلان خلاو تيسلا تنجّم تتعرض لخطايا على الإشهار المزيّف.
ومن جهتها، إعتذرت الشركة لحرفائها ووعدتهم باللي دوب ما تتوفّر الشرايح، باش يعطيوهم القطايع الناقصين.
✔️ التأجيل
باش تكون حريف لتيسلا لازمك تكون صبور، وبرشا كان لزم ! على خاطر تيسلا أعلنت باللي باش يصير تأجيل في تسليم الكراهب. كانك تحب على Model S Long Range / Model X Long Range لازم تستنى لمارس 2023 وكانك تحب على الموديل S لازم تستنى لنوفمبر 2022.
✔️ بيئة عمل خايبة
آي نعم ! ولو إنو نادر وين نسمعو بقضية ضد تيسلا مقارنة بالشركات الكبيرة الأخرى إلاّ إنو الأسبوع الماضي Jessica Barraza رفعت قضية بمصنع الشركة الموجود في فريمونت، كاليفورنيا وصرّحت باللي هي تعرّضت للتحرش اللفظي والجسدي من قبل زملائها. شهادتها خرجت في جريد واشنطن بوست وين حكات على ممارسات غير لائقة ورغم إلي رفعت شكوتها للموارد البشرية… طفّاوها هي وزميلاتها إلي يقاسيو في نفس المعاناة.
في العادة، الشركة تلتجأ لتسويات في القضايا إلي يرفعوهم عليهم خدّامتهم لكن القضية هذي أتو نتبعوها لوين باش توصل.
🎁 BONUS
الخبر هذا ما نحبوش يتعدّى مرور الكرام خاطر نتوقّع إنو باش يكون ليه تأثيرات في المستقبل وإلي هو : آبل وظّفت المهندس السابق في تيسلا إلي كان مسؤول على نظام القيادة الآلية وإلّي كان ينتقد علنا أقوال إيلون ماسك ويعتبرو يغالط في الرأي العام.
علاش الخبر هذا مهم؟ على خاطر فما إشاعات إدور وإنو آبل عملت شراكة مع شركة كراهب وقاعدين يحضرو في كرهبة على قريب.
المصادر:
