كيفاش تستغل شهرة مسلسل باش تسرق الناس؟ إيجا نحْكيوْ على فن الإحتيال 😈

نتصوّركم الكل سمعتو وإلا تفرجتو في المسلسل الكوري إلي حطّم الأرقام القياسية Squid Game (إلّي مازال ما تفرّجش فيه يجي يونّسني  🙂 ).

شهرة المسلسل، ساهمت في ارتفاع عدد البزنس المبنيين على ديزاين المسلسل (حوايج، ڨادجاتس، صندوق ألعاب للتيمْ بويلدينڨ…) وفي ارتفاع مستوى الجريمة الإلكترونية.

أوّل طريقة في عمليات الإحتيال كانت متمثلّة في عملة رقمية SQUID تلانصات في 21 أكتوبر 2021. الشخص أو الأشخاص عملولها موقع موخصّص وصفحات على مواقع التواصل الإجتماعي للإشهار، المؤسس خادم في أمازون و 5 سنين في ناتفليكس، العملة تعاقدت مع ناتفليكس وإيلون ماسك يدعمها. وحتى شي ما كان يدل على إنو الكلو FAKE!

في ظرف جمعتين، سعرها طلع من 0.7 دولار إلى 2856 دولار والبارح فجأة إختفى كل شي.

موقع CoinMarketCap كان حذّر مالعملة هذي بحكم إلي « يستثمر » فيها ما ينجّمش يعاود يبيع ورغم هذا التهافت عليها خلّى العقول الخبيثة تجمع حسب التقدير بين 2.5-3.5 مليون دولار.

(ملاحظة: لأهل الإختصاص العفسة هذي تتسمّى في موندو الكريبتو Rug Pull)

ثاني طريقة كانت في شكل تطبيقات أندرويد. بعد ما أعلنت ناتفليكس على إنها باش إطوّر لعبة مستوحاة من المسلسل، +200 تطبيق يهبط عالبلايْ ستور والكلهم يدّعيوْ إنهم اللعبة الأصلية ومن بينهم تطبيق وصل لـ+1مليون تحميل.

فيهم إلي نيتو طيبة، يحط ألعاب صغيرة ويربح من نظام الإشهارات وفما إلّي نيتو خبيثة كيف تطبيق Squid Wallpaper 4K HD إلي نجّم المطوّر متاعو يحط فيه malware JOKER.

الجوكر تشهر منذ سنوات، وإلي هو واحد من البرامج الخبيثة على أندرويد تخلي الضحية يسجّل في إشتراكات وهمية والتأكيد يتم بالإرساليات وهذا الكل الضحية ما فيبالو بشي.

الطريقة الثالثة، التصيّد عن طريق الإيمايلوات. Kaspersky هبطو مقال حكاو فيه كيفاش عمليات الإحتيال المرتبطة بالمسلسل ارتفعت في المدة الأخيرة. برشا برامج إدور على إنها لعبة وهي في الحقيقة حصان طروادة. برشا إيمايلوات تبعثو فيهم روابط خبيثة يدعيو الضحايا باش يسجلو في الكاستينڨ متاع الموسم الثاني وإلا باش يتفرجو في حلقة جديدة وإلا حتى باش ينستاليو اللعبة متاع المسلسل على تاليفونهم. هذا خلاف المتاجر الإلكترونية الوهمية إلي تسعى لسرقة المعلومات الخاصة بالبطاقة البنكية للضحايا.

برشا محللين نفسانيين ربطو سهولة الوقوع في عمليات الإحتيال وعدم التثبّت في المعلومات بالـ FOMO (Fear Of Missing Out).

ولينا نخافو لا يفوتنا خبر، لايف نرمين، وابينار، مسلسل، فيلم، غناية، ستوكْ، كريبتو، فرصة عمل،  unicorn candidate ، وإلا مقال تهبطو سيرين بن حميدة…

خوذ نفس ✋