كنت حكيتلكم على المشروع المستقبلي لمدينة سيول إلي تحب تصنع ميتافيرس للمدينة، واليوم نحكيو على مشروع السلفادور مع الـ Bitcoin.
في إختتام مؤتمر Bitcoin Week، أعلن رئيس السلفادور على المشروع الجديد باش يجيب الإستثمار للبلاد. المشروع متمثّل في بناء مدينة كاملة تتعامل بالبيتكوين. بالطبيعة، وقت كي خذا الكلمة، حكى بالتّفصيل على تصورو للمدينة وقال باللي باش تتوفّر فيها التجمعات السكنية، المرافق العمومية، وسائل النقل، أماكن للترفيه،… ومراكز تعدين البيتكوين.
وكيف ما تعرفو، البيتكوين يستحق لبرشا طاقة، على ذاكا الرئيس قرّر إنو المدينة باش تكون قريبة من بركان كونشاغوا وباش يتم توليد الطاقة الحرارية الجوفية متاع البركان.
المشروع باش يستحق لمليار دولار وباش يتم عن طريق مستندات البيتكوين (حاجة طوّرتها مؤسسة Blockstream)، وشطر المبلغ باش يمشي للبنية التحتية للمدينة والشطر لاخر باش تزيد السلفادور تشري بيه بيتكوين إلي حاليا عندها +1100 بيتكوين.
وباش تزيد تجذب ليهاا لمستثمرين والسكان، المدينة هذي باش تكون خالية من الضرائب كان TVA باش يقعد.
نذكّركم باللي في سبتمبر إلي فات السلفادور أول بلاد يعلن بالي البيتكوين عملة رسمية إلى جانب الدولار الأمريكي، ورغم هذا كان فما معارضة من السكان وحتى الـ FMI علقت على فكرة مدينة البيتكوين وقالت باللي هي تمثّل خطر على القدرة الشرائية على خاطرها عملة إفتراضية و bla bla bla…
المصادر:
