« أحنا كيف Twitter أما بأكثر حريّة تعبير »

هكا يقدّم روحو موقع التواصل الاجتماعي Parler.com وإلّي خذا صدى كبير ورواج عند المستخدمين خاصة بعد أحداث الشغب في أمريكا.

من المعروف إنو أكثر المستخدمين متاعو، 10 ملاين في نوفمبر، عندهم توجّهات متطرّفة وكان طرّدهم تويتر خاطرهم يُعلنوا على مواقفهم المتشدّدة، parler كان ألطف معاهم ويطفّي الضو على المنشورات هذي.

عاد بعد أحداث الهجوم على الكابيتول، ولنهار الجمعة، +268000 تحميل جديد على الهواتف والتطبيق ولّى في المرتبة الأولى في الآب ستور ومال 10 لوالا في البلاي ستور.

آبل وقوقل نبّهوا عالموقع هذا وقالولهم كان ما تتحكموش في اللي قاعد يتنشر عندكم، رانا باش نفسّخوا ال آب مالستور، وهذاكا إلي صار 

وهو ظاهر فيهم جماعة التاكْ الكل متقلقين من حدود حرية التعبير فالمنصات هذي، على ذاكا آمازون زادا عطات مهلة ل Parler باش يهز الداتا والكود خاطر باش يقصوا عليهم AWS.

مولى الموقع تكلّم وقال باللي هوما يحاولوا يراقبوا المنشورات لكن مش بالساهل الحكاية هذي (نعطيكم تقريب : فايسبوك يخدّم في 15000 مراقب للمنشورات، والموقع هذا فيه 30 موظف كهو) وقال زادا باللي في وقت الغصرة الناس الكل سيبوه.

أنا نتصور كان تطلع حكاية فوكس نيوز صحيحة، باللي ترامبْ انظم ل Parler، ممكن ياسر نشوفوه يستثمر فيها العام الجاي ولا مزيّة لتويتر.