نعرف ! العنوان هذا يجي عنوان كتاب مُترجم في قسم الإقتصاد مش عنوان حكاية جديدة من عندي 😉 أما هات نفركو الرّمانة.

حتى حد ما ينجّم ينكر التغييرات إلي صارت بعد نهار 28 أكتوبر 2021، بالتحديد بعد ما أعلن مارك على إسم شركة فايسبوك الأم الجديد Meta . تقريبا كل يوم خبر جديد يخص الميتافيرس، العملات الرقمية، NFT… وشخصيا قاعدة نحاول نشارك معاكم الجديد والمهم.

والجديد اليوم هو خبر شراء أغلى أرض في Decentraland بقيمة 612.000 MANA لصالح Metaverse Group.

هات نفسّرلكم الجملة إلي فاتت :

📌 آش معناها Decentraland ؟

هي ميتافيرس لامركزي تنجّم تحوّس فيه، تزور المتاجر الموجودين فيه، تحكي مع الناس الموجودين، والأهم تشري فيه قطعة أرض وتبني عليها. الميتافيرس هذا متكوّن بالضبط من 90.601 قطعة أرض إفتراضيّة وكل قطعة عندها سومها الخاص مثلا قطعة الأرض إلي في قلب الميتافيرس ومقابلة الشارع الرئيسي باش يكون سومها أغلى من قطعة أرض في آخر الميتافيرس.

كل قطعة أرض مربوط بـ NFT، هات نفسروه على إنو شهادة الملكية غير قابل للتزوير ويثبت إنو الشاري هو المالك الأصلي والوحيد لهاك الأرض.

باش تشري أرض لازمك فلوس، والفلوس المستعملة في ديسنترالاند هي الـ Mana وهي عملة رقمية مبنية على الإيثيريوم واليوم سومها يفوق +5دولار.

📌 مالا قداش من قطعة أرض تشرات بالسوم هذاكا؟

بالتحديد تمّ بيع 116 قطعة أرض والكلهم في نهج الموضة الموجود في موقع إستراتيجي في ديسنترالاند (Fashion Street) بمساحة جمليّة تقدّر بـ 565 متر مربع (أكبر من ملعب باسكيت).

الثمن الجملي 2.4مليون دولار وعلى ذاكا تعتبر أغلى بيعة وتحطّم الرقم السابق إلي كان 1295000 MANA أي ما يعادل 913.228 دولار في هاك الوقت. (ماهو عملة المانا طلعت في السوم)

📌 وشكونو الشاري؟

الشاري هي شركة Metaverse Group التابعة لـ Tokens.com وهي شركة تستثمر في الأصول الرقمية المدرة للدخل

📌 علاش تمّت هالبيعة؟

من بين المشاريع المرصودة، بحكم إلي الأراضي موجودين في شارع الموضة، ميتافيرس قروب باش يعاقدو مع شركات الموضة ويعملو عروض (كيف الفاشن ويكْ) باش ينجمو بيعو ويحققو أرباح مادية.

نعلمكم باللي في ديسنترالاند فما ماركت بلايس تنجّم تشري فيه حوايج وأكسيسوارات للأفاتار متاعك، مش فقط الأراضي.

النوع هذا من الإستثمارات باهي وإلا لا؟ الأيامات القادمة باش تقوللنا على الإجابة !

المصادر: المصدر 1 – المصدر 2 – المصدر 3