في الهند، عملو برشا قرارات صارمة للحد من الكوفيد، ومن بين القرارات الحد من عدد الضيوف في العروسات، آش خلّى كوبل يفكّر في الميتافيرس كفضاء بديل.
إلي يقول « زواج هندي تقليدي » من المؤكّد تجي في مخو تصاور من أفلام شاروخان وين فما برشا ألوان وعباد زاغطين ويشطحو. وبسبب الكوفيد، في الهند تم الإقتصار على 100 ضيف كهو في حفلات الزفاف. على ذاكا Dinesh Sivakumar Padmavathi and Janaganandhini Ramaswamy (باش نعيطولهم ديناش وجانا) وبحكم خدمتهم وغرامهم بالتكنولوجيا قرّروا إنهم إلى جانب حفل الزواج الحقيقي، باش يكملو حفلتهم في فضاء إفتراضي.
الفضاء هذا باش يكون ميتافيرس مستوحى من مدرسة تعليم السحر Hogwarts إلي تشهرت في سلسلة هاري بوتر (العرايس طلعوا Potterheads – فانز بهاري بوتر)، والدخول ليه باش يكون من خلال التاليفون وإلا اللابتوب. والضيوف إلي باش يكونو قرابة 2000 ضيف ينجمو يختارو الأفاتار متاعهم ويهنيو العرايس منهم ليهم.
الهدف متاع ديناش كان إنو يعمل حاجة بعيدة عن المعتاد ويضرب عصفورين بحجرة : حاجة تقعد الهند الكل تحكي بيها والحاجة الثانية يوصّل مفاهيم التكنولوجيا الجديدة لأكثر عدد ممكن من الناس.
ومن بين الحاجات الأخرى المهمّة إلي باش تصير، إنو بو العروسة إلي توفّى عام لتالي باش يكون حاضر « إفتراضيا » باش يبارك للعرايس.
هوكا للي مازال يلوّج على هدية أوريجينال لعيد الحب، ينجّم يتّصل بالستارت آب tardiverse.com إلي تقوم بصناعة ميتافيرس لكل المناسبات.
العرس غدوة الحي 6 فيفري وكيف ما نقولوها « إن شاء الله بدو بالتمام » !
المصادر
https://edition.cnn.com/style/article/india-wedding-metaverse/index.html
