اليوم وبمناسبة كينوت فايسبوك، باش نحكي على فايسبوك الشركة وعلى مشروعها في تطوير العمل عن بعد باستعمال تقنيات الواقع الافتراضي والـ Metaverse.
نرجع بيكم لسبتمبر 2019، أعلن فايسبوك على موقع تواصل إجتماعي جديد إسمو Facebook Horizon. الموقع هذا باش يكون مختلف عن الموقع الأزرق المستانسين بيه وبقية منتوجات فايسبوك على خاطرو باش يكون مبني على الميتافيرس. اليوم وصلنا للجزء 4 وأحنا نحكيو عالميتافيرس نتصوّر فهمتو الكونسابت ! (كان فاتوك الأجزاء الأخرين تو نخليلك لينكس)
الفضاء هذا باش يكون متكوّن من عوالم إفتراضية تنجم تتنقل بينها. على أول ما تدخل باش تلقى روحك في قرية، تشخّص الأفاتار متاعك إلى ما لا نهاية من التصاميم، وبعد باش تكون قادر على تصميم الفضاء الشخصي متاعك كيف ما تحب وأي شخص ينجّم يزورك فيه. تنجم زادا تشارك في أنشطة جماعية وتتفاعل مع الناس الأخرين.
باش تدخل للعالم هذا لازمك كاسك متاع الواقع الافتراضي، ومش أي كاسك ! فايسبوك، بفرعها Oculus VR المختص في الواقع الافتراضي، تحط على ذمتك منتوجها Oculus الموجود في نسخ عديدة وإلي يُعتبر اليوم واحد من أجود الكاسك الموجودين في السوق. مع الكاسك، فما أدوات تحكّم باش تستحقهم.
لتو مازال Horizon في النسخة التجريبية لكن تمّ تغيير إسمو مؤخّرا لـ Horizon Worlds وتنجم تنضم ليهم باش تجرّب وتصمّم معاهم هالعوالم الافتراضية.
نرجعو تو لـأوت 2021، أعلن مارك في مقابلة صحفيّة على المشروع الجديد إلي تخدم عليه فايسبوك والمتمثّل في Horizon Workrooms وإلي هو فضاء إفتراضي للعمل المشترك. لاحظتو حاجة في الإسم؟
بالضبط ! العالم هذا باش يكون جزء من العوالم الموجودة في Horizon Worlds ومُخصّص للشركات إلي تحب تخدم عن بعد. كيف ما تفاهمنا لازمك الكاسك Oculus Quest 2 وأدوات التحكم باش تنجّم تنقّل الحاسوب، الطاولة، لوحة التحكم، أو الفأرة متاعك للعالم الافتراضي. حاجة تمتاز بيها أوكيليس على بقية المنافسين. بعد ما تسكاني شنوة باش تهز معاك تشخّص الأفاتار متاعك وتلقى روحك في مكتب عمل كبير مع زملائك. من بين الحاجات القوية زادة هي الصوت المكاني Spatial audio إلي يمثّل إمتياز في بعض المنتوجات (كيف Airpods). أوكيليس خدمت عليه مليح وعلى ذاكا كي يتكلم حد على جنبك اليمين الصوت يجي بالأساس مالجهة اليمين. من بين الحاجات إلي تنجم تلقاهم هي السبورة اللا متناهية إلي تنجم تكتب عليها وتحط عليها تصاور من حاسوبك… وفي نهاية الحصة تنجم إتاليشرجي محتوى السبورة.
حاجة أخرى، أي حركة تقوم بيها في الواقع باش تتجسّد في العالم الإفتراضي، كي تهز يدك باش تصوّت على حاجة معينة باش تشوفها تهزّت وكي تقوم وتتحرك في المكان إلي انتي فيه الأفاتار باش يقوم ويتحرّك…
حاسيلو، باش تكون ثورة في تغيير طريقة العمل عن بعد لو التصريحات بخصوص احترام المعطيات الشخصية والحديث إلي يتقال داخل الوورك رومز ما يصيرش استغلالو للإعلانات الموجهة أو نوايا خبيثة أخرى.
مارك كي يحكي على المشروع هذا يقول باللي الهدف من قبل إنو يخلي الناس « مرتبطة » ببعضها، وباللي لازم الشركات يحترمو الأشخاص إلي يحبو يخدمو من ديارهم أو ما يبعدوش عن عايلاتهم. الحواجز الجيوغرافية لازمها ما تكونش عائق باش كل واحد ياخو فرصتو.
(تحية لكل مُشغّل تونسي يخلي المترشح يتنقّل من ولاية لولاية وبعد يرفضو خاطرو يسكن بعيد).
