مع الكورونا والحجر الصحي، برشا شركات مازالو مُصرّين على إنو العمل عن بعد هي طريقة عمل فاشلة، شركات أخرين مازالو مواصلين فيها حتى بعد إنفراج الأزمة، وفما شركات أخرى قاعدة تبتكر في حلول جديدة باش تخلق طرق عمل جديدة… 

صحيح باللي فما شركات فشلت في نظام العمل عن بعد، وبرشا دراسات بيّنت المرض الجديد المتمثل في الـ Zoom Fatigue (كنت حكيت عليها قبل) عند الأشخاص، على ذاكا فايسبوك، مايكروسوفت وشركات ناشئة أخرى خمّمو باش يوظّفو مفهوم الميتافيرس في تطبيقات جديدة :

✔️Gather

تذكرني بالألعاب vintage ! تنجم تصنع فضاء خاص بيك سواء من قالب جاهز (مكتبة، قاعة دراسة، منتزه…) أو تصممو من أول وجديد، تستدعى زملائك (25 بالنسبة للنسخة المجانية) ويفوّر بعض الأدوات إلي تسهل العمل كيف السبورة البيضاء وشاشة تلفاز…

✔️ Sococo

نفس فكرة إلي قبلها، عالم كرتوني مقسّم لبيروات، كل فريق في بلاصة وكل واحد مجسّد بأفاتار (في الحقيقة بدائرة ملوّنة).

✔️ Topia

باش تلقى روحك في عالم مرسوم باليد، تنجم تزيد أو تحذف عناصر. عندك أفاتار حاضر وتنجم تستدعى حتى 20 شخص في النسخة المجانية.

✔️ Kumospace

التصميم فيه أقرب للواقع، ومافيهش كيف إلي قبلو إمكانية تصميم أفاتار. تنجم تحوّس في قاعة العمل متاعك وعندك أدوات للعمل المشترك مع بقية الفريق.

✔️ Teamflow

نقعدو في تصميم أقرب للواقع مع صور ثنائية الأبعاد، التطبيق هذا يوفّر برشا أماكن مختلفة، الأفاتار متاعك باش تكون تصويرتك، تتحرك في البيرو متاعك وما تنجم تسمع كان إلي يبدى في نطاقك. 

منتوج آخر توفرو الشركة هذي وهو للـ online events مع تصميم مميز للقاعات.

✔️ Spatial

هذي متطورة عالي قبلها خاطرها توفّر فضاء بتجسيد ثلاثي الأبعاد، ومن أول استعمال يصنعلك أفاتار من صورتك، ويكون إستعمال البلاتفورم هذي سواء بالكاسك متاع الواقع المعزز أو الواقع الافتراضي AR/VR أو من خلال تطبيق هاتف فيه الخاصية هذي. تنجم تصمّم قاعات العمل بالديكور المتوفّر.

✔️ Microsft Mesh 

برشا شركات إستعملت Microsoft Teams لكن مايكروسوفت من سنوات تخدم عالموضوع هذا وحضرت البنية التحتية اللازمة باش تعمل نُقلة نوعية في العمل عن بعد.

خلاف الخبرة في الكلاود، مايكروسوفت تطلق بلاتفورم Mesh مبنية على الواقع المدمج Mixed Reality وين تنجم تكون أفاتار وإلا hologram. الحكاية هذي لازمها أكسيسوار كيف الكاسك VR/AR وإلي تنجم تلقاه عند مايكروسوفت وإسمو HoloLens.

وهنا نشوفو القوة وراء استثمارات مايكروسوفت إلي وفّرت الكلاود، البلاتفورم والهاردويير باش إدخلك للإيكوسيستام متاعها.

✔️Facebook : شوف الجزء 4