كنت أشرت، في الجزء الأول، وإنو من أشهر تطبيقات الميتافيرس هي ألعاب الفيديو وين تلقى روحك في عالم إفتراضي، تصنع أو تختار شخصية (سمّيناه أفاتار)، تلعب وتتفاعل مع أشخاص أخرين، وتنجّم تشري مثلا حوايج، سلاح، أو أي حاجة تنجّم تعاونك في اللعبة.

وللمعلومة، في فترة الحجر الصحي العام 2020، برشا أخصائيين نصحو بألعاب الفيديو، مش باش يحصرو الناس في ديارهم لكن الدراسات أثبتت باللي ألعاب الفيديو تنجّم تقطع مع الواقع وتكون متنفّس لحكاية جديدة، أو حتى شخصيّة جديدة. ما نحبّش نحكي برشا في الموضوع هذا باش ما نخرجش على الموضوع الأصلي، لكن نحب نشير إلي دراسة قامو بيها باحثين تابعين للـ L’Atelier (فرع من بنك Bnp Paribas) على الجوانب الإقتصادية، الاجتماعية والنفسية للميتافيرس ومن بين أكثر الحاجات إلي شدّتني وهو التأثير إلي يتعدى من العالم الافتراضي للواقع بفضل أو بسبب الأفاتار. (مثلا كان الأفاتار متاعك يعبّر على شخص واثق من روحو، نسبة الثقة متاعك باش تزيد في حياتك الواقعية). هذا قوس وسكرتو.

نرجع تو للعبة Fortnite وإلي هي تُعتبر وحده من أهم الألعاب إلي تمثّل الميتافيرس. نهار 2 فيفري 2019 قدّم الـ DJ Marshmello لايف دام لـ 10 دقائق في وسط اللعبة. +10 ملاين شخص كانو حاضرين في الحفلة هذي وإلي هو يُعتبر رقم قياسي سواء للإيفنتس إلي تعملهم فورتنايت أو بالنسبة لعدد الأشخاص الموجودين في نفس الفضاء الرقمي في نفس الوقت.

في طنبك الحجر، 23 أفريل 2020، الرابور Travis Scott يقدّم حفلة موسيقية وعلى مدة 10 دقايق وحضر فيها +12 مليون متفرّج/لاعب. وعلى خاطر الحفلة نجحت، عاودوها أكثر من مناسبة وحققت عدد مشاهدات يفوق 27 مليون. وهنا ولات فورتنايت ماشية في مجال إستضافة الحفلات الموسيقية.

7-9 أوت 2021، جولة موسيقية بعنوان Rift Tour تقدّمها مغنية البوب Ariana Grande لايف في اللعبة وهنا فورتنايت عطات أكثر حرية للمغنية باش تختار العوالم إلي تحب تغني فيهم، وتم تصوّرهم وصناعتهم.

برشا مغنين عالميين نلقاوهم في قائمة الانتظار في الحفلات الجديدة، سواء على فورتنايت أو منافسيها.

لعبة أخرى مشهورة وتنافس فورتنايت إلي هي Roblox. شهر بعد ما دخلت للبورصة، روبلوكس توصل قيمتها السوقية لـ +45 مليار دولار يعني أقوى من برشا شركات معروفين في صناعة ألعاب الفيديو كيف EA.

روبلوكس ماشية على نفس المنوال متاع الحفلات الموسيقية ونلقاوها في 2021 استدعات أسامي كبار كيف Royal Blood و Lil Nas X.

هو الحق يقال، فورتنايت مش هي أول وحده تعمل الحفلات الموسيقية في اللعبة، سبقوها قبل ألعاب أخرين نذكر منهم Minecraft قدمت مهرجان Coachella وقبلها عام 2008 لعبة Second Life Dublin احتضنت عرض موسيقي لايف لفرقة U2.

ألعاب الفيديو مش التطبيق الوحيد للميتافيرس وغدوة نحكيلكم على وحده من أهم التطبيقات إلي تخدم عليهم فايسبوك ومايكروسوفت.