بعد ما حكيتلكم البارح على السياحة الفضائية مع إيلون ماسك، جيف بيزوس وريشارد برانسون إلي طالع اليوم للفضاء، اليوم نكمّل نحكيلكم على الملياردير الشاب Jared Isaacman.

للي ما يعرفش « جارد إيساكمان » هو مؤسس شركة Shift4 Payments أسسها وهو في عمر 16 سنة، مش فالڨاراج متاع دارهم، لكن في القبو. في 2012 أسس Draken International إلي توفّر تدريبات للقوات الجوية الأمريكية على خاطرو مالصغرة مغروم بالطيارات وخاصة الطائرات النفاثة ومتمّرس في قيادة الطائرات العسكرية وحاصل على رقم قياسي عالمي في الطيران حول العالم بطائرة نفاثة (62 ساعة).

جارد تفاهم مع SpaceX باش يقوم برحلة سياحية للفضاء متكونة فقط من ناس عاديين في آخر 2021، هو المموّل للرحلة هذي وهو إلي باش يقود Falcon 9.

الرحلة هذي باش تكون تحت عنوان Inspiration4  والهدف هو جمع تبرعات لجمعية St Jude وباش يهدي فيها 3 تساكر للي باش يرافقوه :

– الأمل : التسكرة هذي باش تمشي لمرأة نجحت في التغلب على مرض السرطان في طفولتها

– الكرم : التسكرة هذي باش تمشي لشخص تبرّع للجمعية

– الإزدهار: التسكرة هذي باش تمشي لشخص يحب يطلق مشروعو الخاص ينجم يغيّر بيه العالم.

الرحلة باش ادوم أيامات وين المركبة الفضائية باش تقعد ادور حول الأرض، وجارد يوعد بإنو كان تنجح الرحلة هذي باش تكون فرصة لبرشا ناس عاديين إنهم يزوروا الفضاء ويحققوا حلم من أحلامهم.