اليوم باش نرجع على خبر إستقالت جاكْ دورسي من تويتر على خاطر بالنسبة ليا هذي فرصة باش نحكيلكم  على شخصية جاكْ الفذّة وحكايتو مع تويتر.

جاكْ دورسي وتأسيس تويتر

يظهرلي جاكْ أقل واحد ظهورا في الإعلام مقارنة بنجوم السيليكون فالي (مارك، بيل قايتس، جوبز…) رغم إلي يتشارك معاهم نفس الحكاية: شخص مغروم مالصغرة بالأنفو، بطّل الجامعة باش يحل مشروع العمر أما مش في ڨاراج.

تويتر تصنع في ظروف مختلفة شوية: كان مشروع جانبي للـ Odeo إلّي يخدم فيها جاك كمبرمج. 

الستارت آب هذي تقدّم في سرفيس بودكاست وفي 2005 آبل تدخل لنفس المجال ياخي جاك اقترح فكرة كان يخمّم فيها سنين : موقع يخلي المستخدمين يتشاركو فيه الرسائل القصيرة. من الفكرة هذي طوّر مع المؤسسين نموذج أولي كان بإسم Twttr  وتلانصا نهار 21 مارس 2006.

وهنا تبدى الدراما !

على أوّل ما بدى تويتر يلقى في شهرة عند المستعملين والمستثمرين، إيفان ويليامز يطرّد نوح قلاس (واحد من المؤسّسين) لبرشا أسباب منهم إنو نوح مصرّ إلّي هو السبب في نجاح تويتر بعد ما حسّن في فكرة جاكْ. 

في 2007 كان جاكْ هو المدير التنفيذي لتويتر، لكن بعد بعام يقرّر إيفان إنو ياخذ بلاصتو بتعلّة إنو جاك مش قاعد يطور في المنتوج ولاهي بحصص اليوغا وتصميم الأزياء ويخليه في مجلس الإدارة.

وكانت هذي ثاني تطريدة لجاكْ من شركة يأسّسها : التطريدة الأولى كانت في 2002 والشركة تحلّت في 2005 بعد فقّاعة الدوت كوم. ومعلومة أخرى على جنب، إيفان ويليامز هو مؤسّس Blogger و Medium.

فترة قيادة إيفان لتويتر كانت من أخيب الفترات، على ذاكا رجع جاكْ في 2011 بهدف إنو يطوّر في المنتوج… ورجع كرئيس تنفيذي « مؤقّت » لتويتر. وفي 2015 يعيّن مجلس الإدارة جاك كرئيس تنفيذي دائم ولازمو يبتكر طريقة تخلّي تويتر يدخّل الفلوس… ونسبيا نجح بعد سنوات !

اليوم نلقاو مداخيل تويتر متعدّدة كيف الإشهارات المدفوعة إلي تمثّل 86% من نسبة المرابيح الجملية، و Data licensing إلي تتباع للشركات باش يحللو المعلومات المتعلقة بالمستعملين والتراندس. خلاف هذا، تويتر تستعد باش تطلق Twitter Blue إلي باش يكون مدفوع (3دولار / شهر) وقاعدين يخدمو على Tips إلي باش تخلي المستعملين يتبرعو لصانعي المحتوى والهدف إنو تكون التبرعات مبنية على نظام مالي لامركزي (بالبيتكوين والإثيريوم)

مالا لواه جاكْ قرّر تو الإنسحاب؟

هو صحيح جاكْ في رسالتو قال « الشركة تنجّم تتواصل بعيد على مؤسسيها » لكن من وجهة رايي لازمنا ناخذو بعين الإعتبار برشا حاجات أخرى :

شخصية جاكْ : في 2019 صندوق التحوّط إليوت شرا أسهم في تويتر وبدا ينتقد في جاكْ بسبب اللوك (لحية طويلة، bonnet…) وقالو باللي هو لاهي بـ Square (شركة إلي أسسها جاك في 2009 مختصة في الدفع بالموبايل) أكثر من تويتر.

للمعلومة: نسبة كبيرة من ثروة جاك جاية من سكوير واليوم تبدل إسمها لـ Block وفيها عملة Spiral crypto على خاطر جاكْ مغروم بالعملات الرقمية ويعتبر البلوكشين مش قاعدة تتحصّل على الإستثمار اللازم باش تتطوّر.

خلاف هذا، جاكْ حكى على فكرة إنشاء موقع تواصل إجتماعي لامركزي، ممكن المشروع كان باش يتخدم وسط تويتر، لكن نتوقّع تو إنو باش يخرج في قالب شركة جديدة بقيادة جاكْ.

توجّه تويتر : كي تخدم على مشروع وحدك تكون عندك رؤية محدّدة، وكي يدخلو معاك مستثمرين يولّي فما ضغط آخر ويتغيّر التوجه. وهذي نتصوّر أكثر حاجة قلّقت جاك. ولو إنها فرضية مستبعدة، لكن قرار حظر ترامب من تويتر نتصوّر كان ليه تأثير باش يقرّر أياماتو في تويتر. ونتوقّع المدة القادمة باش يتغيّر خطاب تويتر خاصة فيما يخص « حرية التعبير ». 

قرار جاكْ نعتبرو قرار واضح متاع شخص ما يحبّش يكون في قالب واختار إنو يكون كيف ما هو ويعمل الحاجة إلي يحب عليها ويأمّن بيها.