نرجع شوية لموضوع الفضاء بحكم إلي فما برشا نقاشات مفتوحة تخص لقب « رائد فضاء »، التصورات المستقبلية للفضاء والبزنس لوين ماشي…

كيف ما حكينا المرة الأخرى، قلتلكم باللي جيف بيزوس أعلن إلي هو طالع للفضاء نهار 20 جويلية (النهار هذا رمزي بحكم هو الذكرى 52 لأول خطوة لنيل آرميسترونغ على القمر) ومن المضحكات إنو عريضة إلكترونية دارت بين برشا ناس يطالبوا فيها بيزوس باش ما يرجعش للأرض.

وكيف ما حكينا زادا، باللي ريشارد برونسن أعلن بعدو بأيامات باللي هو طالع للفضاء نهار 9 جويلية، من باب المنافسة على شكون الأول.

الظاهر إنو بيزوس تنبز من الحركة الرشيقة لبرونسن ياخي BLUE ORIGIN هبطت تويت فيه مقارنة لرحلات الفضاء ل2 شركات (أعمل طلة عالتويت)

والأدهى من هذا، بيزوس قال بالي برونس ما وصلش للفضاء خاطرو ما فاتش خط كارمن خاطر ما نفوتكمش بالحديث، برونسن طلع لمسافة 86كلم في ساعة ونص بينما بيزوس طلع لمسافة 106كلم وهبط في 11 دقيقة (واحد يستعمل في طيارة معزّزة ولاخر في صاروخ).

شنوة هو ال Karman Line?

كان ما سئلتش روحك قبل « منين يبدا الفضاء؟ » انجم نقلك باللي خط كارمن هو الفاصل بين الغلاف الجوي للأرض والفضاء. بالنسبة للناسا الخط هذا يبدا من 100كلم على سطح الأرض لكن في الأصل إلي اخترعو كي عمل حساباتو لقاه 80كلم وشوية صرف وباش ما يصعبهاش ردها 100كلم.

عالم الفيزياء الفلكية Jonathan McDowell أكد هو زادا بعد ما نشر نتيجة الأبحاث إلي قام بيها باللي بداية من 80كلم انجمو نبداو نحكيو على الفضاء. وعدم الدقة في المسافة الصحيحة السبب متاعو وانو فما برشا أغلفة جوية وكل واحد عندو ميزتو خاصة في كثافة الجزئيات إلي فيه إلي تتأثر ببرشا عوامل طبيعية. (شوف المقال هذا)

أنا من رايي، محور النقاش مش في برونسن وصل للفضاء والا لا، لكن في كيفية التسويق للرحلات الفضائية بحكم الرحلتين هاذم هوما بداية حلقات السياحة الفضائية. بالنسبة لبرونسن هذي كانت تذكير للجيل إلي من بعدو باللي الشرق (أوروبا) عندها ما تقول في الفضاء ومازالت تنجم تقدّم ما خير حتى للأثرياء التقليديين كيفو. وبالنسبة لبيزوس حسن اختيار المرافقين وحدو يخليه يشكّب باش يوصل رسالة « الفضاء للجميع ».

نذكركم باللي طلع للفضاء هو وخوه و Wally Funk (رائدة فضاء تحرمت من الرحلات هاذم بسبب العنصرية في الناسا) وشاب عمرو 18 سنة بوه شرالو التسكرة إلي تحطت في المزاد وهكا يكونو على التوالي أكبر وأصغر رواد فضاء.

خلاف هذا، بيزوس تصورو للفضاء مستقبلي وعلى أجيال: السيد يحب يعمل مستعمرات وينقل الصناعات الثقيلة والضارة بالأرض للفضاء وخاصة (كي نحكيو بزنس) يحظّر البنية التحتية باش تتعمم السياحة الفضائية، بينما برونسن بالنسبة ليه هوكا يحقق أحلام حرفائو إلي وصلو لـ 600 يستناو في دورهم ومنهم  Elon Musk.

ماسك، وباش ما نعاودش إلي حكيتو قبل، بالنسبة ليه الفضاء هو استعمار مارس ويحب يمشي يعدي التقاعد غادي لكن هذا ما يمنعش إنو SpaceX بدات تسوق للسياحة الفضائية بعد ما تعاقدت مع شركة تنظم مثل الرحلات هاذم وإلي هي Axiom Space لكن قبلهم أول رحلة سياحية عند سبايس إكس باش تكون من نصيب الميلياردير الياباني Yusaku Maezawa