ما صدّقنا لربّي سكّرنا دوسي TikTok بعد ما وافق ترامْب على الصّفْقَة إلّي صارت بين Oracle وBytedance (مازالت الموافقة الصينيّة)، بدينا نَحْكيوْ تو على خروجْ Facebook ومنتوجاتو من الإتّحاد الأوروبي.

الحكاية وباختصار وإنّو السّلطة المكلفة بحماية المعطيات الشّخصيّة في إيرلندا رفعت دعوة قضائيّة (مش الأولى) ضدّ فايسبوك لانتهاكه حرمة المعطيات الشّخصيّة إلّي ماعادش تحمل صفة « شخصيّة » بسبب المراقبة المشدّدة في رحلتها من أووربا لأمريكا. قالولهم « معطيات الأوروبيين تبقى في أوروبا » خاصّة وإنّو القوانين إلي تحمي المعطيات الشّخصيّة في أوروبا أصعب وأدق ومعاييرها تختلف على القوانين الأمريكيّة.

فايسبوك في إجابته على الحكاية هذي قاللهم تصّعبوا فيها علينا، مالا تو نسكّروهم (رغم إلّي ما نتصوّرش إنّو ينجّم يستغنى على 400 مليون مستخدم أوروبي).

مش أوّل مرّة تصير مناوشات قضائيّة بين أوروبا وفايسبوك (نذكّركم إلّي في جويليّة فايسبوك رفعت قضيّة ضدّ الإتّحاد الأوروبي لانتهاك الحياة الشخصية متاع الموظفين متاعو كي طلبوا عليهم معطيات وملفّات دقيقة باش يكملوا التحقيقات الجارية حول استغلال المعطيات الشخصية من قبل فايسبوك) لكن نتصوّر إنّو المرّة هذي الحكاية باش تتجاوز شويّة ملياردوات تعويضات بعد ما شافوا سياسة Trump مع الصّين.