أيامات لتالي برشا من مطوّري الواب فرحوا بخبر مفاده إنّو ميكروسوفت ماعادش باش تدعم واطوّر متصفّحها إكسبلورر. شخصيّا، نعتبرو متصفّح ساهم برشا في تطوير مجال الواب من خلال عيوبو وصفاتو وحتى منافستو الشهيرة في أواخر التسعينات لـ نات سكايب.

عام 95، شركة نات سكايب دخلت للبورصة بقيمة سوقيّة تقدّر بـ 2 مليار دولار بعد ما ولاّت تبيع في المتصفّح متاعها للشركات بـ 100 دولار. بيل غايتس ما قعدش ساكت وحرفيّا عمل خطّة داخل ميكروسوفت باش يقضي على نات سكايب.

في نفس العام تهبط نسخة ويندوز 95 إلي وقتها تتسمّى ياسر مستحدثة وعليها نسخة مجانيّة من أنترنات إكسبلورر.

صحيح في النسخة الأولى منّو ماكانش في المستوى التقني للمنافس متاعو، أما بالتحديثات وفي ظرف 5 سنين تتقلب موازين القوى ويولي إكسبلورر هو الأول من حيث الاستعمال بنسبة تتجاوز 80% بعد ماكان يملكها نات سكايب.

وبعد، ومع فقاعة الدوت كوم ظهر فايرفوكس ودخل في المنافسة حتى جا في 2008 جوجل كروم وتصدّر على العرش لليوم بحوالي 67% من الاستعمال.

المنافسة صحيح ساعات ادمّر شركات وحَيَوات بشر، لكن كان ما فمّاش منافسة ما انجّموش نقدّموا.

وفمّا حكاية فهمها جوجل وهي أهميّة إنوا يكون المنتوج متاعك واضح للمستعمل، على ذاكا جوجل تدفع كل عام برشا فلوس لآبل باش ينجّم يكون كروم آنستالا على الآيفون.

وفي الختام، وبمناسبة حديثنا عالمتصفّحات، بسبب كوفيد-19 فايرفوكس تقرّر إنّها تسرّح 25% من العاملين.