في الموضوع هذا حكيت باللّي قطاع الصّحة هو أكثر قطاع مستهدف عند الهاكرز وباش نضيف للّي حكيت عليه حادثة صارت نهار 27 سبتمبر 2020 في زوز مستشفيات تابعين لـ Universal Health Services واحد تضرب ب malware Ryuk والثاني ب Ragnar Locker.

ياخي بالوقت وقفوا نظام المعلومات باش يمنعوا توغّل لبرمجيات الخبيثة. وللعلم إنو المعلومات الصحية في أمريكا مطلوبة برشا في السوق السوداء.

ياخي لهالدرجة نظام الحماية ضعيف وإلا الهاكرز قويّين؟

فما دراسة حديثة خرجتها IBM

25% : خلل في الحماية

25% : خطأ بشري

50% : نجاعة الهجمة وفمّا تكتيك استراتيجي يتّبعو الهاكر باش ينجّم يسيبلي الضحية، ويوصل يلمّد المعلومات وبعد أكثر من 200 يوم يسيب طلب الفدية.

في الحالة هذي برشا ينصحوا بعدم الدفع باش ما يصيرش تمويل للجريمة المنظّمة ولازم طول تتصل بالموقع nomoreransom.org إلي قادرين يرجعوا المعلومات (أما مش بنسبة 100%)

لكن هذا ما يمنعش إنو كان يتمّ نشر وبيع المعطيات الشخصية للموظفين متاعك وعملائك، الشركة تتخطّى بمبلغ مالي كبير (بمقتضى RGPD ) والمبلغ هذا كان تم استثمارو في الحماية راهو خير لجميع الأطراف.

وبعد ما كانوا يستهدفوا المستشفيات، ومع ظهور شويّة لقاحات فعّالة ضدّ الكوفيد، هاكرز روس (Strontium) ومن كوريا الشمالية (Zinc) هاجموا مخابر في العالم أجمع إلي متقدمين أكثر في اللقاح.

7 مخابر في الجملة متوزعين في أمريكا، فرانسا، كوريا الجنوبية، الهند وكندا وفاقوا بيهم جماعة ميكروسوفت.

الهجمات ما نجحتش، لكن السؤال الأهم شنيّة الغاية من تعطيل خروج اللقاح؟