كانك ڨديم عالفايسبوك ونومرو تاليفونك موجود فيه، مبروك عليك ! نومروك تهاكَا 

باحث في الحماية إسمو Alon Gal فاق بـ بوتْ في Telegram قاعد يبيع في نوامر 500+ مليون مستخدم في الفايسبوك والنومرو على 20دولار ومعاه تخفيض كان تشري +10000 نومرو 

صحيح الحكاية عندها جمعتين ماللي فاقوا بيها، لكن في الأصل الثغرة الأمنية هذي ترجع لـ 2019 وين فايسبوك استعرف في سبتمبر 2019 باللي +400 مليون نومرو مربوطين ببعض المعطيات الشخصية كيف الاسم، الجندر، الموقع… تهاكاوْ ونفس الحكاية تعاودت في ديسمبر 2019 ياخي فايسبوك فتح فيها تحقيق خاطر Comparitech and security researcher فاقوا باللي قاعدة البيانات إلي فيها نوامر التاليفونات مش محمية والمعلومات الشخصية هكاكا مسيبة (كان تتذكر معايا قبل، كنت تنجم تلوّج على شخص من خلال رقم الهاتف وتتواصل معاه).

Facebook أعلن باللي الثغرة تصلحت، لكن المعلومة إلي تفلت… ماعادش تنجّم تحميها. ومثل المعلومة هذي، رقم الهاتف، تنجّم تُستغل في الإشهارات الموجهة وإلا التصيّد والتحيّل.

هات نربطوا الخيوط ببعضها كي فهمنا الغاية، ونعاود نرجع بيكم تو لسنين لتالي وقت إلي كان فايسبوك يطلب إجباريا رقم الهاتف لتأكيد الحساب ويسوق فالحكاية على أساس هي الطريقة الفعّالة لاسترجاع حسابك كي يتبيراتا… خطة فايسبوك وقتها كانت جمع أكثر نوامر باش ينجم يخدم على مشاريعو الربحية بعد ما شرى واتس آب والاستراتيجية هذي تتأكد اليوم بعد الخوضة إلي قامت على القوانين الجديدة متاع Whatsapp.