إيجا نفهموا الخوضة إلي قامت على فايسبوك هالنهارين…
الحكاية مش جديدة، في جانفي حكيتلكم عليها (Hackers exploit the vulnerabilities of Facebook … who is the smartest?)
ونلخّصهالكم في كلمتين :
في سبتمبر 2019 فايسبوك استعرف باللي +400 مليون مستخدم تهاكى على فايسبوك بسبب ثغرة أمنية في قاعدة البيانات متاع نوامر التاليفونات، ونفس المشكلة صارت بعد أشهر لكن فايسبوك أكّد باللي الثغرة تصلّحت، وكيف ما قلتلكم في المقال الفوقاني « المعلومة إلي تفلت… ماعادش تنجّم تحميها. »
في جانفي 2021 فاق خبير في الحماية باللي فما بوتُ على تالغرام قاعد يبيع في المعطيات متاع المستخدمين إلي تهاكاوْ وأعلن عليها والخبر تعدى مرور الكرام.
مالا شنوة الجديد باش الناس الكل ولات تحكي عالموضوع هذا؟
الجديد وإنو السبت 3 أفريل المعطيات هاذوكم الكل تحطّوا للعموم في مواقع القرصنة، وولاّت « فضيحة بالجلاجل » لفايسبوك كيف ما يقولوا خواتنا المصاروة.
كيفاش تعرف إلي معطياتك تسرّبت؟
فما موقع تابع فايرفوكس قاعد يدور باش تثبت يا هل ترى الإيمايل متاعك تهاكى وإلاّ لا، أما أنا نعطيكم المصدر الرسمي وإلي لاهين بيه باحثين في الحماية إسمو haveibeenpwned.com.
The original article was posted on LinkedIn
