إيلون ماسك كان حاضر في لايف The ₿ Word نهارين لتالي وكالعادة، هو يتكلّم وسوق الكريبتو تتحرّك.

ماسك أكّد باللي Tesla and SpaceX عندهم مخزون من البيتكوين وعلى المستوى الشخصي هو زادا يستثمر في ال Bitcoin, Ethereum & Dogecoin.

هات قبل نذكركم باللي في آخر مارس 2021، ماسك أعلن باللي تيسلا باش تولي تقبل البيتكوين كعملة رسمية تنجّم تخلّص بيها، وبعد 49 يوم بدّل رايو وقال باللي البيتكوين يستهلك في برشا طاقة مضرّة وغير مستدامة وتيسلا تلوّج على حلول صديقة للبيئة مش تضر بيها على ذاكا ماعادش باش تقبل البيتكوين.

الحاجة الجديدة إلي قالها إيلون باللي تيسلا باش تعاود تحل الخلاص بالبيتكوين على شرط وإنو الطاقة المُستخدمة في التنقيب على البيتكوين تولّي طاقة خضراء (مصدرها الريح، الشمس…). وكان وصل التحوّل الطاقي، إلي من وجهة راي ماسك ماشي في الطريق الصحيح، لـ +50% وقتها تيسلا تنجم ترجع الخلاص بالبيتكوين

مانيش باش اناقش طريقة ماسك في التأثير على سوق العملات الرقمية، لكن تساؤل جاني في مخي بعد ما قريت الخبر هذا وهو : ياندرا تيسلا باش تفعل الخلاص بالبيتكوين في الصين؟

باهي، هات نحطكم في الإطار : الصين عندها خطة (الحقيقة برشا خطط) فيما يخص التحول الطاقي وخاصة التشجيع على استعمال السيارات الكهربائية وتيسلا من قلائل الشركات الأمريكية إلي رحبت بيهم الصين على أراضيها (لا قوقل ولا أمازون نجموا يقاوموا المنافسة الصينية).

في نفس الوقت، في ماي طاحت قيمة البيتكوين بعد ما منعت الصين استعمالو وخاصة سكرت قرابة 26 شركة تنقيب عالبيتكوين على أراضيها. قوانين المنع جات بالولاية بالولاية آش خلى المنقبين يهربوا لأمريكا، كندا وخاصة لكازاخستان إلي مافيهاش برشا مراقبة والطاقة الكهربائية فيها رخيصة.

باش تفهموا تأثير القرارات هذي، الصين في سبتمبر 2019 كان فيها 75.5% من جملة حقول التنقيب طاحت في أفريل 2021 لـ 46%.

تنجّم تصريحاتو تقلق الحكومة الصينية والا طريقة الدفع هذي ما تصير كان في دول محدودة؟ على كل، بالنسبة لماسك هو يأمن بالعملات الرقمية ويحب البيتكوين ينجح ويتعمّم… أما زعمة لمصلحتو الشخصية والا بنية طيبة؟