الحاسيلو كان فما مؤثّر حقيقي في وقتنا هذا ما ينجّم يكون كان Elon Musk

نعرف كثّرت عليكم بالحديث عليه المدة هذي لكن الأحداث تخليني نزيد نحكي عليه مرة أخرى.

نهار 29 جانفي، إيلون حط فال bio عالتويتر Bitcoin ياخي القيمة متاعو طلعت بـ 20%

البارح، 8 فيفري Tesla تعلن بإلّي هي إستثمرت بما قيمتو مليار ونص دولار في البيتكوين ومستقبلا باش تولّي تقبلها كعملة معتمدة في الخلاص.

وكنتيجة متوقّعة جدا القيمة زادت طلعت وحطمت الأرقام القياسية ووصلت لقرابة 43000 دولار. 

Tesla مش جديد عليها التجديد والإبتكار من الجانب التقني والتسويقي. نذكّركم باللي وقت العالم الكل دخل في حجر صحي في مارس إلي فات، تيسلا، وعلى عكس شركات الكراهب الأخرين، إستغلت الوضع والتكنولوجيا وطريقة البيع الإلكتروني. يعني تكماندي الكرهبة مالسيت، توصلك للدار وإلا تجيبها من أقرب نقطة بيع. وكان لا قدر الله ما عرفتش كيفاش تستعمل الكريهبة، تو تلقى فيها tuto.

مانيش باش أكثر نعلق، لكن معلومة نقولها ونتعدى باللي دولة كيف الهند قاعدة تحضر في قانون لمنع العملات الرقمية كيف البيتكوين باش تنجم تطلق عملتها الرقمية وتنافس البقية.

ومعلومة أخرى نقولهالكم : اليوم قيمة العملة الرقمية لدولة تعكس قوتها الإقتصادية في المشهد الجيوسياسي الجديد.

* الصورة نشرها آلون كدعم لل Dogecoin