يظهرلي آبل لازمها تحط تحذير على علبات السماعات اللاسلكية Airpods على خاطر ولو إنها حكاية اليوم طريقة، إلاّ إنها تنجّم تكون خطر على صحة المستعملين.

نهار الجمعة إلي فات، التيكتوكوز @iamcarliiib تهبط فيديو جديد تبكي وخايفة على خاطرها بلعت آربود. حربوشة الحساسية في يدها اليمين، والآربود في يدها اليسار وعن غير قصد تحط الآربود في فمها وتبلعو بجغمة ماء. بعد ما فاقت بالغلطة، تربثت وكلمت صاحبها باش تحكيلو الحكاية وبعد هبطت فيديو على تيك توك 🙂

كي مشات للطبيب وعمللها تصويرة، قاللها باللي « ما تقلقش، تو تتخلص منو بطريقة طبيعية ».

الأغرب من هذا، إنو الآربود قعد كوناكتا بالآيفون وجربت تسمع الغناء في معدتها 🤔

حادثة كيف هذي مش أول مرة تصير، في فيفري إلي فات راجل مستانس يرقد بالآربودز في وذنيه، فاق الصباح يلقى روحو بلع وحده منهم.

حادثة أخرى مماثلة على طفل في عمر 7 سنوات، هداتلو أمو في راس العام آيفون ومعاه الآربودز برو، حط الآربود في فمو ياخي، عن غير قصد كيف العادة، بلعو.

ما تقلقوش، الكلهم لاباس تو… لكن إلّي يقلّق هو طريقة تعاملنا مع أدواة المفروض إنها تسهللنا حياتنا مش تعقّدها.

الجيل القديم : وإنتوما صارتلكم طرايف هكا مع الـ walkman ؟

المصدر: blacksportsonline