فما إشاعات عندها مدة إدّور مفادها إنو العملاق Microsoft يحب يشري برنامج المحادثات Discord ومؤخّرا هبط مقال على المجلة الإلكترونية Bloomberg أكّد صحة الخبر هذا وفشل عملية الشراء.

Discord للي ما يعرفوش هو برنامج محادثات لمختلف المنصات والأنظمة وتشهر خاصة عند لاعبي ألعاب الفيديو. في 2015، زوز مطورين صنعوا لعبة باسم Glitch لكن ظاهر فيه الإسم ماكانش مغري برشا للاعبين على ذاكا اللعبة ما نجحتش لكن في المقابل اللاعبين عجبهم نظام التشات ياخي المطورين ركزوا في مشروعهم الجديد على الخاصية هذي واليوم يُعتبر ديسكورد أحسن برنامج محادثات نص، صوت وفيديو عند اللاعبين. وبالوضع الصحي في 2020 خذا شهرة كبيرة خاصة بغرف المحادثات الخاصة إلي أي حد ينجم يصنعها ويضيف فيها أشخاص أخرين.

من 2018 بدات عروض الاستحواذ أو الشراء تجي لديسكورد وآخرها كان عرض Microsoft إلي اقترحت مبلغ 12 مليار دولار لكن تم رفع المبلغ هذا على خاطر Discord يحب يدخل للبورصة ويربح أكثر. وفما أخبار أخرى تقول زادا باللي فما مبالغ فاقت 15 مليار دولار تم رفضها والشارين أسماء معروفة كيف Amazon, twitter, Epic Games…

وللمعلومة، هذي مش أول محاولة شراء تخسرها مايكروسوفت، نذكركم باللي أشهر لتالي فشلت في الاستحواذ على Tiktok وقبلها Pinterest.