كيف ما وعدتكم أول الجمعة، وكيف ما حبيتو، نرجعلكم اليوم بتلخيص لأهم حاجات جاو في الكينوتس متاع آبل، قوقل، سامسونغ، سوني وهواوي.

الاثنين:

آبل قدمت الكينوتس متاعها وإلي قدّمت فيها منتوجات جديدة

• الجيل الثالث من سماعات AirPods إلي يجي بديزاين يجمع بين ديزاين الجيلين السابقين، وبقوة بطارية إلي تضمن 6 سوايع من الإستعمال المتواصل ، وأهم حاجة خاصية الصوت المكاني Spatial Audio إلي يخليك تسمع الصوت كاينك في وسطو.
• مازلنا في الصوت ومع ألوان جديدة تقترحها آبل في منتوجها HomePod وإلي قبلو بشوية أعلنت على إشتراك مدفوع لخدمة الموسيقى بسعر تنافسي مع غيرها من المنافسين كيف أمازون.
• شريحة M1 إلي يتم تطويرها باش تتجاوز سابقتها وإلي تخرج في 2 نسخ M1 Pro & M1 Pro Max
• بالطبيعة، بعد ما طوّرنا في الشريحة لازم نحطوها في ماكينة، على ذاكا يجي الـ Macbook بتحديثات جديدة وموجّه خاصة للي يستحقو إعدادات قوية مع RAM قوية

باش نعطيكم فكرة بالأرقام على قوة الماكينة الجديدة :

أضعف ماكينة تلقى فيها 

8 CPU, 14 GPU, 16 Neural Engine, 16 Go RAM

وأقوى ماكينة توصل للـ

10 CPU, 32 GPU, 16 Neural Engine, 64 Go RAM

الشاشة تجي بـ 2 قياسات 14 والا 16 إنش، ويرجع منفذ HDMI، قارئ بطاقة SD، ويب كام بدقة 1080بيكسل وبرشا تحديثات أخرى على مستوى الديزاين، تحسينات في قوة الشاشة وسرعة عرض الصورة وشحن أسرع مالسريع.

وبالنسخة الجديدة مالماك بوك والشريحة القوية، آبل تأكّد تمكنها التقني وتخليها الكامل على Intel وتتوجه للمتحترفين بالمنتوج هذا.

الثلاثاء :

قوقل تقدّم الجيل 6 من هاتفها Pixel إلي نلقاوه في 2 نسخ Pixel 6 & Pixel 6 Pro وهو منتوج معملة عليه قوقل باش تاخو حصة من سوق الهواتف. شنوة الجديد في البيكسال؟

كيف ما نعرفو، قوة الهاتف هذا هو في الكاميرا وحسن اتقان قوقل على دمج المكونات التقنية مع برامجها باش يخرّج تصاور بجودة عالية. ممكن يجي البراعة في المجال هذا، الـ 2000 مهندس إلي أبقات عليهم قوقل بعد ما شرات شركة HTC.

نحكيو شوية خصائص تقنية، في الموديل العادي نلقاو كاميرا رئيسية 50ميغابيكسيل مع تصويب 1.85/f والبرو توصل الكاميرا لـ 48ميغابيكسيل مع تصويب 3.5/f وتكبير 4x. ومن بين الحاجات الجديدة في السوفت ويير (المرتكز برشا على الذكاء الاصطناعي)، خاصية Motion إلي يخليك في ثواني تنحي أي حاجة في التصويرة.

في النسخة هذي مالبيكسال، قوقل تكبّر في حجم هاتفها ونلقاو شاشة الموديل العادي OLED Full HD+ بـ 6.4 إنش بينما النسخة البرو تتميز بشاشة منحنية OLED  Quad HD+ بـ 6.7 إنش.

وأهم تغيير، قوقل كيف آبل وسامسونغ، تقرّر إنها تتخلى على الشرائح الحاضرة وتصنع الشريحة الجديدة Tensor إلي فيها 2 من Cortex X1 يعني مرتين أقوى من شريحة Snapdragon 888 (حكيت عليها في أكثر من مناسبة).

وباش توصل لأكثر مستهلكين، قوقل تقرر إنها تخفّض في السوم مقارنة بالي موجود عند المنافسين.

الاربعاء:

• سامسونغ في البداية قدّمت منتوجها Galaxy Z Flip 3 Bespoke Edition وإلي هي نسخة تعطي حرية لكل حريف إنو يختار 2 ألوان من جملة 5 ألوان.
• النسخة المستقرة للسوفتويير One UI 4.0 المبني على نظام أندرويد 12 وإلي باش تكون متوفرة في ديسمبر. النسخة هذي تعطي حرية أكثر للمستخدم باش يختار التصميمات إلي تناسبو في تاليفونو من ألوان وأشكال الإيقونات.
• في الختام، سامسونغ تقدّم النسخة Bespoke Edition لساعاتها الذكية. 

يعني إلي نستخلصوه مالكينوت متاع سامسونغ إنها باش تخلي المستهلك ياخو منتوجات personalized حسب ذوقو…

الخميس:

هواوي تسجل حضورها بمنتوجات جديدة:

• نسخة جديدة من هاتف Nova 9 إلي يجي بشاشة كبيرة 6.67 إنش، معالج Snapdragon 662، 6جيغا RAM و 128جيغا مساحة تخزين، بطارية 4300 mAh وكاميرا 64ميغابيكسل.

كيف ما تشوفو من الخصائص، المنتوج هذا ماهوش فائق الجودة بعد مارينا الآيفون 13 والبيكسل 6 مؤخرا.

• ساعات ذكية Watch GT 3 & Watch Fit Mini 

الجمعة الجاية باش تكون مهمة زادة خاصة مع الحدث نهار 28 أكتوبر وين مجموعة فايسبوك باش تعلن على إسمها الجديدة ومشاريعها المستقبلية.

Stay tuned…