Clearview وحدة من الشركات الناشئة إلي عملوا ضجّة في 2020 بسبب التكنولوجيا إلي تستعمل فيها وبرشا قضايا ترفعوا ضدّها.

الشركة هذي مختصة في facial recognition يعني التعرف على الأشخاص من خلال صورة بفضل الذكاء الإصطناعي. تأسست في 2016 ومن بين الحرفاء متاعها +600 مركز شرطة ويستعملوا السرفيس باش يتعرفوا على المجرمين. السرفيس هذا يسوقوا فيه تحت اسم Smartcheckr وهو أقوى ببرشا من Google images فيه قاعدة بيانات متاع تصاور مليارات الأشخاص تم تجميعهم من خلال المواقع وخاصة مواقع التواصل الإجتماعي عن طريق تقنية web scraping، مبعد تجمع التصاور متاع شخص وتعملو ألبوم صور ومعاه لينكس لحساباتو على كل سوشل ميديا. التقنيات المستعملة تنجّم تتعرّف على أي شخص حتى لو كان لابس نظارات أو طربوشة وتعرف مكان الشخص بالتفصيل.

لحد ما ولّى Smartcheckr يستعملوا فيه الخواص بدات الفوعة. في جانفي 2020 تويتر رفعت قضية بـ Clearview وطالبتها بحذف جميع الصور إلي نستختهم من موقعها… نفس الشي مبعد صار مع Facebook و Youtube. وفي فيفري 2021، السلطات الكندية أقرّت باللي الشركة قاعدة تخترق في البيانات الشخصية للناس. لكن المسؤولين على الشركة قالوا باللي هوما ماهمش يعملوا في حاجة غير قانونية ومتمسكين بموقفهم.

وفي الحوار هذا الكل، الشركة نجمت تقنع المستثمرين بقوتها وفي جوان 2019، هزّت 9 مليون دولار كـأول fundraising وإلي يعتبر مبلغ محترم.