باش نحكيلكم حكاية تنجّم تكون مُحبِطَة لكن نحبكم تفكّرو فيها من جانب القيادة وإلا كيف ما يقولها طرودي الإيدرشيب.

الجمعة إلي فاتت، قرّر المدير التنفيذي للستارت آب Better.com (قيمتها اليوم تتجاوز 7مليار دولار) إنو يجمع 900 عامل (9% من إجمالي العاملين) في الشركة في zoomCall ويعطيهم هديّة آخر العام.

الهدية متمثّلة في تطريدة.

« كانك حاضر معانا اليوم في الزوم كول هذا، راك تابع المجموعة قليلة الحظ إلّي تمّ طردها. العمل عندنا يوفى تو، أو بالأصح حالا »

في 3 دقايق قاللهم باللي أداءهم كان أقل من المطلوب وبالي هو مُجبر على إتخاذ قرار كي هذا للمرة الثانية، وكان المرة الأولى هبطت دمعة من عينيه، المرة هذي باش يحاول ما يتأثّرش.

بعد ما كمّل كلمتو إلي كانو حاضرين في الزوم تسكّرت عليهم المحادثة تلقائيا وإلّي كان في عطلة وماحضرش، تكفّلت الشركة إنها تمشيلهم وين ماهوما باش تعلمهم بقرار الطرد. هذا خلاف الإيمايل إلي يشرح أسباب الطرد.

بعد الكول Vishal Garg كمّل في خطابو الحماسي للفريق إلي مازال وقاللهم وقّيت باش نلانصيو النسخة الجديدة من better.com علما وإنو الشركة هزّت 750 مليون دولار قبل بجمعة وقاعدين يحضرو باش يدخلو للبورصة في ماي القادم. وبالطبيعة قرار كي هذا باش يزيد يوفّر مدخول أكثر للشركة.

خطاب تسريح من العمل (أو طرد إختار المصطلح إلي تراه مناسب) بالطريقة هذي خلّى ڨارڨ محل إنتقاد برشا صحف، مستثمرين وحتى مديرين في الفريق الحالي ليه إلي قرّرو إنهم يستقيلو.

وباش يدارك الوضع، من غدوة بعثلهم إيمايل يفسّر فيه باللي هو غلط وكارو حسب كلامو مليح ويستعرف بالي صارت مشكلة متاع تواصل.

فما تحقيق خرج في thedailybeast فضح ممارسات مشبوهة يقوم بيها ڨارڨ داخل وخارج الشركة، لكن كيف ما قلت مالأول نحبكم تركزو على الجانب القيادي لشخصيتو. هل تعتبر إلي عملو عادي وإلاّ متطرّف؟

BONUS:

قبل ما تجاوب، أعمل طلة على نوعيّة الإيمايلوات إلي يبعثهم للفريق

“HELLO—WAKE UP BETTER TEAM. You are TOO DAMN SLOW. You are a bunch of DUMB DOLPHINS and…DUMB DOLPHINS get caught in nets and eaten by sharks. SO STOP IT. STOP IT. STOP IT RIGHT NOW. YOU ARE EMBARRASSING ME.”