شركة بالقيمة متاع آبل ما تنجّمش تغيب عالأخبار ويقلّ الحديث عليها، وأنا رغم إلّي نحاول نحكي على بقيّة الشركات الأخرين، إلاّ إني نلقى روحي ديما نرجع ديما نحكي عليها.
اليوم اخترتلكم 3 أخبار متعلقين بجديد الشركة التفاحة
Self Service Repair
من سنوات وآبل تأكّد على المستخدمين باش ما يحاولوش يفكّكو وحدهم الآيفون، الآيباد وإلاّ الماكْ بوكْ ولازم الإستعانة بمختص. لكن في نوفمبر 2021 آبل ترجع في سياستها وتعلن على سرفيس جديد يخلّي المستعمل ينجّم يصلّح وحدو تاليفونو من غير حتى مساعدة من عند مختصّ.
السرفيس متمثّل في موقع مختص في بيع قطع الآيفون الأصليّة. آبل قالت باللي السرفيس هذا باش يكون متاح لكل الأجهزة إلي فيهم شريحة M1 وباش يبداو بالآيفون 12 و 13 وخاصة بتصليح البطارية، الشاشة والكاميرا. خلاف القطع الأصلية، آبل باش تحط على ذمتك الأدوات اللازمة من مفك براغي وغيرو وزادا باش يكون فمّا دليل بالصوت والصورة والنص باش تنجّم تصلّح وحدك من غير ما تفسّد التاليفون.
السرفيس هذا باش يبدى حيّز التنفيذ في أول 2022 في الولايات المتحدّة وبعد ينتشر في العالم.
علاش آبل قرّرت إنها تبدّل رايها؟
الحقيقة، هي خطوة إستراتيجية على لـ 2 أسباب:
1 « الحق في التصليح » وهو حق معترفين بيه برشا دول يعطي الحق للمستعمل إنو يصلّح وحدو أجهزتو الإلكترونية (repair.org)
2 حد ما يعارض باللي آبل قاعدة تخسر ماليا بسبب القطع الغير الأصلية وإلي تملى السوق ويستعملوها برشا صلاّح على إنها قطعة أصلية.
وفي انتظار يتلانصى السرفيس هذا في تونس، كان صلاّح في المنصف باي قالك باللي القطعة أوريجينال، راهو غالط!
Apple Car
في مقال في Bloomberg، هبط مقال طويل ومن مصادر موثوقة فيما يخص التقدّم إلي تحقّق فيه آبل فيما يخص السيارات الكهربائية. نذكّركم بالي الإشاعات حول سيارة آبل بدات من 2015 وتعرف بالمشروع Titan ولليوم وين بدات ملامحو تظهر. أول حاجة مهمّة في المقال، ولّينا نعرفو باللي 2025 هي السنة إلي باش تبدى فيها آبل تبيع الكرهبة. وثاني حاجة، إنو آبل قاعدة تخدم على القيادة الذاتية للسيارة، يعني المستوى5. للمعلومة، فمّا 5 مستويات في السيارات ذاتية القيادة (المستوى 0 ما حسبتوش) واليوم تيسلا وصلت للمستوى 2 مع كراهبها.
من طموحات آبل مع كرهبتها إنو ما يكونش فيها لا مقود ولا بيدالات، فقط كراسي مرتاحين وشاشة كبيرة عبارة على آيباد باش تقصّر الوقت للراكبين، لكن ما نتصوّرش إنو المعايير باش تتبدل باش تنجّم آبل تطرح منتوج كي هذا !
مازالو 3 سنين قدّام آبل باش تبهرنا، زعمة تنجح في إلي فشلت فيه قوقل، أوبر وتيسلا؟
Apple vs Pegasus
آبل ديما حريصة إنّها تذكّر باللي الآيفون أكثر هاتف محمي، لكن بعد فضيحة Pegasus ظاهر فيها « تنبزت » وعلى ذاكا رفعت قضية بالشركة إلي طورت برنامج التجسّس Pegasus
ملاحظة: في الموضوع هذا فسّرت آش صار
Pegasus Project : the new massive scandal
الطلب متاع آبل واضح : أمر قضائي يمنع NSO من إنها تستخدم أي برنامج، أو خدمة أو جهاز من آبل.
بعد بأشهر، آبل أعلنت باللي الثغرة ForcedEntry إلي إستعملوها الأشرار باش ينستاليو البرنامج الخبيث تم إصلاحها في iOS 15. وزادت أعلنت مستعملي الآيفون المتضرّرين بإلي لازمهم يحتاطو خاطرهم مراقبين، وحطت 10 مليون دولار على ذمة الباحثين في الأمن الإلكتروني باش تعاونهم في أبحاثهم. علاش آبل استنات المدة هذي الكل باش تبدى هجمتها على NSO ؟
الحق ما عنديش إجابة، لكنها هكا تنظم لميتا (فايسبوك سابقا)، قوقل ومايكروسوفت إلي عندي قضايا ضد نفس الشركة من 2019.
المصادر:
