إنك تكون شركة تقنية ويتم إختراقك وتتفرض عليك فدية، هذي حاجة ولاّت عادية اليوم. لكن يم إختراقك مرتين في نفس العام، هنا نحطو نقطة إستفهام كبيرة على نظام الحماية الموجود في الشركة.
كيف ما حكيتلكم قبل، بداية شهر أكتوبر كان كاسح شوية لبرشا شركات كيف فايسبوك، سناب شات، OVH… ومعاهم مؤخّرا الشركة التايوانية Acer إلي بعد نهارين من نشر نتائجها المالية، يتنشر خبر قرصنتها على الدارك ويب ومعاه تهديد بنشر معلومات الملايين من عملائها لو ما تدفعش فدية.
نهار 13 أكتوبر، مجموعة القراصنة Desorden تعلن بالي تمّ إختراق سرفورات فرع Acer في الهند ونجمو يستولاو على 60 جيغا من معلومات شخصية تخص حرفاء الشركة (الإسم، الإيمايل، الهاتف، معلومات الدخول للحساب…)، ومن جهة أخرى معلومات تخص التجّار والموزعين إلي تتعامل معاهم الشركة، ومعلومات دقيقة لملفات مالية تخص الشركة.
وباش يبرهنو على صحة كلامهم، القراصنة نشرو مجانا 10.000 معلومة على الحرفاء وبعض الصحف قامو بالتدقيق واتصلو بالضحايا وأكدو صحّة المعلومات.
الناطق الرسمي باسم الفرع عطى تصريح بعد بنهار أكّد فيها صحة الخبر وباللي سرفورات خدمة ما بعد البيع في الهند تمّ إختراقهم وإلي هوما « اتخذوا الإجراءات اللازمة » (ذكروني في حكاية BIAT) وباللي العملية المعزولة هذي ماهيش باش تأثّر على نشاطهم.
Cyberattack on a Tunisian bank
نرجع بيكم لمارس 2021، مجموعة القراصنة الروس REvil طلبوا 50 مليون دولار كفدية لازم Acer تدفعها باش ما ينشروش معلومات تهمّ الشركة. معلومات تخص نظام عمل الشركة، وثائق مالية، معلومات تخص الموارد البشرية بما فيها من معلومات حسّاسة ومعلومات تخص المعاملات والشراكات التجارية… يعني ملخر ما قعدتلهم كان سلسلة الإنتاج ما اخترقوهاش وهكاكا تاقف الشركة كليا !
من جهتها Acer ما اعتبرتش روحها ضحية وقالت باللي هي تتعرض بشكل دوري لعمليات قرصنة وأبلغت السلطات المكلفة بحماية المعطيات الشخصية في برشا دول بالهجمات ومحاولات الاختراق.
لكن المجلة الإلكترونية The Record media تجيب الخبر الصحيح وباللي الشركة كلّفت مفاوض مختص في الجرائم الإلكترونية باش يحكي مع القراصنة ويوصل معاهم لاتفاق.
حادثة مماثة تعرضتلها شركة الإلكترونيات Quanta ووصل التهديد لآبل بحكم إلي هي تصنّع عندهم في شريحتها الجديدة M1. نخليلكم الرابط كان ما تعرفوش الحكاية.
