هذا مش علم تونس المستقبلي، هذا علم الباربادوس، أول دولة عندها سفارة في الميتافيرس.
الباربادوس موجودة في بحر الكراييب، واليوم هي أحدث جمهورية في العالم بحكم إلي نهار 30 نوفمبر 2021 خرجت من الحكم الملكي البريطاني وشدّت ساندرا ماسون رئاسة الجمهورية.
الباربادوس ولو إنها صغيرة، عدد سكانها ما يفوتش 300.000 ساكن في مساحة 431 كيلومتر مربع، إلاّ إنو مشاريعها كبيرة ومواكبة للعصر كيف السفارة في الميتافيرس.
شكون وراء الفكرة هذي؟
مهم نعرفو خلفية الشخص إلي كان وراء الفكرة هذي خاطرها ما جاتش من فراغ، على ذاكا نقدّملكم « غابرييل عابد » إلي حاليا هو سفير الباربادوس في الإمارات. غابرييل قرى التشفير وأمن الشبكات في كندا ومن غادي بدا الغرام بالبلوكشين. في 2013 كي فهم الهدف من وراء البيتكوين، أسس Bitt شركة مختصة في الكريبتو عاونت بلادو وبلدان أخرى مجاورة في إنشاء عملاتهم الرقمية.
معلومة على جنب : اليوم الشركة هذي قاعدة تعاون في نيجيريا باش تأسس عملتها الرقمية
الشخص هذا مغروم بالتكنولوجيا الحديثة، واليوم يخدم مع الإمارات على « دبلوماسية التكنولوجيا » على خاطر ما يخفاش عليكم بإلي الإمارات هي زادا عملت خطوة باهية في المجال التقني ومش لازم نذكّركم بمهمة « مسبار الأمل » لاستكشاف الفضاء.
جهود غابرييل أثمرت في نوفمبر إلي فات على إتفاقية بين الباربادوس والميتافيرس Decentraland باش يأسسو فيها سفارة.
Decentraland ?
سبق وحكيتلكم على أغلى أرض إفتراضية تباعت في الميتافيرس هذا، واليوم أكبر الماركات كيف غوتشي وديور يبيعو عليها في ملابس إفتراضية تحت ما يسمى بالـ NFT.
شنوة الهدف من إحداث سفارة إفتراضية؟
السفارة باش تكون حاضرة في أول السنة الجديدة وحسب تصريحات غابريال، باش تكون فما e-visa تسهل على الناس باش يدخلو للباربادوس خلاف الخدمات العادية للسفارة. وباش تسهّل عليهم بناء علاقات دبلوماسية مع بلدان أخرى. اليوم البارباروس عندها 18 بعثة دبلوماسية لكن بالميتافيرس تنجم توصل +190 دولة أخرى. في السفارة ينجمو يعرضو قطع فنية ديجيتال تتباع كـ NFT باش يثمنو الموروث الثقافي للبلاد.
مشروع كيف هذا باش يتكلّف بين 5-50 ألف دولار، لكن ديسانترالاند وغيرها تبرعولهم بالأراضي إلي باش يبداو عليها. وبالنسبة للسفير، التكاليف معقولة وحتى أقل من تكاليف إنك تعمل سفارة في كل بلاد.
غابرييل عابد ما ينفيش إلي المشروع ممكن يفشل، كيف ما ينجّم ينجح وتولّي الباربادوس رائدة في المجال هذا وأهم حاجة قالها « نبداو من تو ونلقاو الشعب حاضر خير ماللي نوصلو لـ 2030 وين تكون الميتافيرس مستعملة في كل بلاصة ووقتها ترصيلك تبدى تفسر فيه لشعبك ».
وقتاش تونس تدخل للميتافيرس؟
شخصيا كي نقرى أخبار كي هذي ونشوف باللي بلدان صغيرة (كمبوديا، مالطا، الباهاماس،…) إلي كانت معمّلة على الترف إقتصاد وسياحة كيفاش اليوم تحارب باش ترسي الإقتصاد الرقمي وأحنا مازلنا نحكيو على « رقمنة الإدارة » نحس بعمق الهوة إلي تفصلنا. يظهرلي الـ 10 سنين العجاف إلي تعدينا بيهم كانو سبب باش ما تقدّمناش في « العادي » إلي عند البلدان الأخرى واليوم فرصتنا باش نعملو خطوة كبيرة ونعاندوهم في نسقهم.
ما تقولوليش اليوم فما مشاكل في تونس أهم مالميتافيرس، وباللي هذي حكاية ممكن ما تنجحش خاطر وقت الإخوة Lumière قدمو السينما للعالم قالولهم « إلي على الشاشة مش ممثلين حقيقيين وماعندكم وين باش توصلو بالسينما ».
المصادر
