شقولك كان يفاجؤوك إلي يخدمو عندك بكرهبة تيسلا؟ هذي صارت وتنجم تصير معاك كانك تفكّر كيف Dan Price. دان برايس هو المدير التنفيذي لشركة الخدمات المالية Gravity Payments إلي أسّسها عام 2004 وإلّي بسببها ولّى مليونير في سن 31. 6 سنين لتالي وهو يحوّس في الجبل مع صديقتو، حكاتلو كيفاش هي تخدم في 2 وظائف ومش خالطة خاصة بعد ما الكاري زادها في سوم الكراء. دان قعد يخمّم في الحكاية واكتشف باللي هو جزء من نظام تصنع باش يخلق فوارق بين الناس. والحاجة هذي ما عجبتوش وتذكر حاجة مهمة ! تذكّر باللي هو قرى دراسة لـ دانيال كاهنيمان وأنغوس ديتون (ماخذين جائزة نوبل في الإقتصاد) باللي الأمريكي مستحق لـ 70 ألف دولار كأجر أدنى باش يعيش مرتاح. ياخي لمّ إلي يخدمو في الشركة الكل وأعلنهم بقرارو : ماليوم باش نزيدكم 20% مالشهرية حتى يوصل أقل واحد فيكم يخلص 70 ألف دولار سنويا. برشا منهم ما صدقوش إلي سمعوه ! الخطوة هذي جابت لدان برشا رسائل تأييد وتكتبت عليه مقالات باللي هو أحسن مدير، كيف ما جابتلو برشا إنتقادات واعتبروه باللي هو موقف سياسي من دان وفما شكون توقّع باللي الشركة باش اطّيح خاطر العاملين باش يصرفو الفلوس فين ما جاء وراش ليمبو (مذيع) وقتها قال جملة ما تتنساش « ماصاب تكون الشركة هذي (ڨرافيتي) نموذج يتقرى في برامج الماجستير لرجال الأعمال حول إخفاق الإشتراكية، على خاطر الشركة هذي ماشية في طريق الفشل ». لكن حدث ما لم يكن في الحسبان ! بعد الزيادات، صغار الموظفين كانو متحمسين وتحمّلو مسؤوليات أكبر، وبالتالي نقصت برشا خدمة على كبار الموظفين الشي إلّي خلاهم يركزو على أهداف ما أكبر. والنتيجة؟ صحيت ! ارتفعت أرباح الشركة من 3.8 مليار دولار سنويا لـ 10.2 مليار دولار وارتفع معاها عدد الموظفين، وعدد الولادات 😉 وكيف ما تقول روسيتا (مديرة المبيعات) : كي تنحي من مخّك المشاكل المادية تنجّم تركّز أكثر على خدمتك، واليوم الناس تجي مش باش تقبض شهرية، أما يجيو باش يقدّمو أحسن ما عندهم. نهار بعد نهار، كان واضح باللي فما تغيير جذري قاعد يصير في الشركة ، رغم إلي دان عمل تضحيات وأولها إنو شهريتو إلي كانت 1.1 مليون دولار في العام هبطت للـحد الأدنى 70 ألف وإضطر إنو يبدل أسلوب حياتو باش يوصل للهدف متاعو. وبعد ما عدّى 12 سنة بنفس الكرهبة، إلي يخدمو معاه هداولو تيسلا كهدية عرفان. وفي فترة الكوفيد، كي بدات ڨرافيتي تحقّق في خسائر، برشا من الموظفين تطوعو باش تنقص شهريتهم مؤقتا وتكافؤو على موقفهم من بعد. دان يقول باللي هو صحيح كان يتمنى ينافس ثورة زوكربيرغ، لكنو اليوم راضي على روحو أكثر ويتمنى لو يتبعوه في الشركات الكبيرة. This not about the money; it’s about making a good impact as a leader.