قاعدين إتبعو معايا في النسق السريع إلي عايش فيه العالم بين الميتافيرس والكريبتو والـ NFTs ؟ هذا ما يتسمى شي قدّام السرعة إلي باش يشهدها موندو ألعاب الفيديو على قريب!

الشركة الفرنسية Ubisoft تعلن نهار 7 ديسمبر على إطلاق منصّتها الجديدة Quartz إلّي باش تخلّي اللاعبين يتحصلو على NFTs في شكل أكسيسوارات للعبة Tom Clancy’s Ghost Recon Breakpoint. مبدئيّا، باش يتمّ مجانا عن طريق drops في أيامات محدّدة وباش تكون بكميّات محدّدة.

الأكسيسوارات متمثّلة في :

– سلاح ، لازم عالأقل المستوى 5 في اللعبة، وصار التوزيع المجاني نهار 9 ديسمبر

– قناع، لازمو +600 ساعة لعب، واليوم يصير التوزيع المجاني

– سروال، لازمو +100 ساعة لعبة، والتوزيع يصير نهار 15 ديسمبر

إلي يحب يخلط عالفرصة، يمشي للموقع الرسمي يسجّل فيه، ولازم يكون عمرك +18، وعندك حساب في Ubisoft Connect وبالطبيعة ماكش في تونس على خاطر السرفيس هذا تمّ إطلاقو في 9 دول (أمريكا، كندا، فرنسا، ألمانيا، إيطاليا، إسبانيا، بلجيكا، أستراليا والبرازيل).

الحاجة المميزة في الأكسيسوارات هاذم باش يكون عليهم رقم تسلسلي وإلي ربحوهم ينجمو يبيعوهم بالسوم إلي يحبو عليه في وحده مالماركت بلايس هاذم rarible.com or objkt.com والمشروع الكبير إنو يتمّ إستعمالهم في ميتافيرس مفتوح تخدم عليه Ubisoft.

خلاف هذا، هالتوكنز الغير قابلين للإتلاف (عاونوني في توْنسَة كلمة Token) باش يكونو مرتكزين على بلوكشين Tezos صديقة البيئة بحكم تستهلك أقل طاقة مقارنة بغيرها.

برشا لاعبين محترفين رفضو المبادرة هذي على خاطرها باش تجبر بقية أستوديوات تطوير الألعاب كيف Electronic Arts ، Rockstar Games، Nintendo… إنهم يتّبعو نفس المنوال في وقت كثرت فيه الألعاب إلّي ادخّل مرابيح للشركات وغابت الألعاب إلي تخلّي اللاعبين يعيشو في تجربة جديدة مع كل لعبة. (ذكروني خنحكيو على نوع الألعاب play-to-earn)

معلومة على جنب : اليوم ميتا أطلقت الميتافريس Horizon للعموم في أمريكا وكندا.