واحد من المشاريع إلي ميتا ما نجحتش باش تقدّم فيهم هو مشروع العملات والمحافظ الرقمية، وعلى أول ما تمّ الإعلان على عملة Libra والمحفظة Calibra والمشرعين ضدّهم بالقوانين.
في جوان 2019، تم الإعلان على مشروع بقيادة برشا شركات ومنظماتهم منهم فايسبوك (حاليا ميتا) وبقيادة دافيد ماركوس (تذكّر الإسم هذا) إلي انظم لميتا في 2014 وكان مشرف على ماسنجر. شهر واحد بعد الإعلان، صارت إنتقادات كبيرة ومارك تضيّف في الكنغرس الأمريكي باش يسمعوه ويفهمو فكرة المشروع الجديد.
عملة ليبرا كانت باش تكون عملة رقمية (مش كيف البيتكوين خاطرها مركزية)، وباش تكون عملة ثابتة وين باش يتمّ دعمها بأصول مالية تحافظ على سعرها. وهكا فايسبوك باش يولّي يقترح نظام نقدي جديد.
المشرعين ما اقتنعوش بكلامو وبعض الدول كيف فرانسا وألمانيا قالو باللي هوما مش باش يستعرفو بيها كعملة وماهمش باش يخليو كيان خاص تولّي عندو سلطة نقدية عليهم. على ذاكا في جويلية 2019 أعلن مارك على إنو باش يصير توخير في إطلاق العملة هذي حتى ياخو الموافقة القانونية عليها.
كل توخيرة فيها خيرة، لكن مع ليبرا ماكانش فما خير بحكم إلي أهم الفاعلين كيف بايبال، إباي، ماستركارد، سترايبْ، فيزا… خرجو من المشروع في أكتوبر 2019 ووقف الدعم على مشروع ليبرا.
في سبتمبر 2020، تتبدّل المعطيات، وتتبدّل الأسامي (تو فهمت التكتيك متاع مارك: كل ما يكثر الضرب تبدّل الإسم). ليبرا ولاّت إسمها Diem وتم تغيير التوجه الكل ليها وولات عملة رقمية عادية مربوطة بقيمة الدولار، والمحفظة الرقمية المرافقة ولّى إسمها Novi وتخليك تبعث وتستقبل الفلوس عليها بالوقت، من غير « مصاريف الشحن » وبحماية مطلقة. والجمعية المسؤولة على المشروع هذا ولاّت إسمها Diem Association وما فما حتى علاقها بينها وبين فايسبوك.
لليوم والمشروع متعطّل، ولو إنو دافيد نجّم يلانصي المحفظة Novi كمشروع نموذجي في أمريكا وغواتيمالا في أكتوبر 2021 إلاّ إنو قرّر أخيرا الإنسحاب ويخلّي بلاصتو للرئيس التنفيذي السابق لـ Upwork إلّي مازال وين انظم لميتا في أوت 2021.
شخصيا، نتصوّر بإلي بعد التحول إلي صار في مشروع ليبرا، ميتا باش تدمج Diem في الميتافيرس إلي تحظر فيه…
المصادر:
