وحده من أكبر التحديات إلي تواجه الميتافيرسز هي الانغماس الكلي في العالم هذا بالحواس الخمس، ولو اليوم نجحو الشركات باش يخليو المستعمل يشوف ويسمع إلي صاير في ميتافيرس، إلي إنو الخدمة على حاسة اللمس مازالت متواصلة.
مختبر Reality Labs التابع لشركة ميتا ينشر مقال نهار 16 نوفمبر 2021 حكاوْ فيه على التقدّم إلي حققوه في ابتكار قفازات ذكية تخليك تحسّ بالأشياء الموجودة في الميتافيرس.
الباحثين عندهم 7 سنين وهوما يطورو في الابتكار هذا، الابتكار شمل تطوير البرنامج المصاحب للقفازات، لكن زادا القفازات في حد ذاتهم إلي تمّت صناعتهم مالـ 0. فما تجديد كبير في نوعية القماش المستعمل، وخاصة في حجم المحركات إلي يوصل عددها لأكثر من 100 في القفاز الواحد. المحركات الصغيرة هي المسؤولة على التحكم في تدفّق الهواء في القفاز باش يعطي للمخ الإحساس كاينك تمسّ في حاجة وإلا تنزل على حاجة. وهالمحركات تتحكّم فيهم شريحة Microfluidic ذكية وسرعتها عالية باش ما يصيرش توخير في إيصال المعلومة بين الحاجة إلي تمسّ فيها والإحساس بيه من خلال القفازات.
التقدّم إلي وصلتو ميتا مع القفازات ماهوش شوية لكن المنتوج هذا لازمو يستنى بين 10-15 سنة حتى يكون متاح للسوق. من هنا لوقتها لازم يخدمو أكثر على الديزاين وعلى سهولة استعمالو وعلى توافقو مع اليدين. ومن هنا لوقتها نتصوّر باللي الشركة الناشئة HaptX (هزّت 12 مليون دولار في 2019) تنجّم تقدّم للسوق منتوج منافس هذا كان ما تمّش احتكارها من قبل شركات أخرى.
