تتذكروها حكاية العملة الرقمية الوهمية إلي استغلو بيها شهرSquideGame باش يقلبو الناس في فلوسهم؟ الحكاية اليوم ما عندها حتى علاقة بعمليات الغش 🙂
قبل كل شي كان فاتتك أشهر عمليات الغش التابعين للمسلسل، هاني حكيت عليهم هنا
Squid Game and the art of scam
سوم العملات الرقمية هالأيامات مش راكح، وخاصة البيتكوين والإثيريوم طاحت قيمتهم مقارنة بأول الشهر… لكن في المقابل عملة Omicron صنعت الحدث الويكاند إلي فات، وعملت قفزة حد ما كان يستناها بسبب الكوفيد.
✔ الإسم عالإسم وربي يجيب القسم
نهار الجمعة إلي فاتت، منظمة الصحة العالمية تقرّر إنها تعلن رسميا على خطورة المتحوّر الجديد للكوفيد وتعطيه إسم. وكيف ما تعرفو، تجنّبا للعنصرية، المنظمة اختارت الحروف اليونانية باش تسمي متحورات الكوفيد في عوض ما نقولو كوفيد الصين والهند…
المتحوّر الجديد إسمو خذا حرف الأوميكرون ο
✔ ياخي طول تعدّينا مالدلتا للأوميكرون؟
لا، آخر متحوّر عندو إسم كان mu μ والمنظمة تجنّبت الزوز أحرف اللاحقين
ν في نطقو يشبه لكلمة new
ξ يشبه في نطقو لاسم رئيس الصين وأسامي أخرين ksi/xi
وزيد المتحورات الأخرين ماكانوش يمثلو خطر كيف الجديد على ذاكا ماصارتش عليهم برشا خوضة إعلامية.
✔ شنية عملة Omicron ؟
مشروع أوميكرون يعرّف روحو على إنو بروتوكول مشفّر لامركزي ومبني على توكنْ OMIC وهو إلي يتم التداول عليه. هدف المشروع هذا هو بناء نظام مالي لامركزي « مُستقر » على المدى الطويل. (نسخة من مشروع Olympus)
نهار 8 نوفمبر 2021 بدات التداول على توكن الأوميكْ بسعر أولي قرابة 200دولار وبعد طاح لـ 63 دولار حتى نهار 26 نوفمبر بعد ما أعلنت المنظمة على إسم الكوفيد الجديد الناس بداو يشريو ويبيعو في الأوميكرون آش خلاه يوصل لـ+680 دولار.
ممكن برشا مشى فيبالهم إلي عندو علاقة بالكوفيد، وممكن فيهم شكون يتبّع في الموجة… أما ظاهرة الإستثمار في مشاريع متعلقة بالكوفيد مش جديد وCOVIDPunks مثال عليه.
✔ تنجم تكون عمليّة تحيّل؟
نستبعد الإحتمال هذا خاطر كيف ما حكينا الأوميكرون ظهر قبل إعلان منظمة الصحة وحتى لو إلي صنعوه عندهم غزرة مستقبلية ماكانش متأكّد إنو المتحوّر هذا باش يكون خطير وتصير عليه بروباڨندا.
شخصيا (وبعيد الشر عليكم)، نحب نعرف شنوة باش يصير كان يظهر متحوّر آخر وتسميه المنظمة π وكيف ما تعرفو ديجا فما عملة رقمية بنفس الإسم هذا 🤔
المصادر:
