بعد عامين من دخولها للصين، البارح شركة تطوير الألعاب Epic Games تقرّر إنها تسكّر سرفورات لعبتها فورتنايت. أما علاش؟
قبل ما نجاوب على السؤال هذا، باش نرجع بيكم لسبتمبر 2021 وين الحكومة الصينية لاحظت تغييرات غير مرغوب فيها عند القاصرين ياخي حطتلهم قانون جديد :
« ما فمّاش ألعاب فيديو طيلة الأسبوع، أما عندك الحق في ساعة لعب نهار الجمعة، السبت والأحد »
(عندي مهارات ترجمة قوية من الصينية للتونسية)
الأقوى من هذا، إنو الحكومة فرضت زادا وقت لعب محدّد والقاصر ينجّم يختار الساعة يا 20 يا 21 وبعد يشد فرشو.
وكان حب يغشّ ويعمل هوية مزيفة؟ الحكومة خمّمت فيه وعملتلو نظام تعرّف بالوجه مبني على الذكاء الإصطناعي. وهذا الكل يتمّ بمساعدة العملاق الصيني Tencent إلي يوفّر أكثر التطبيقات إستعمالا في الصين ومنهم تطبيق weGame.
يعني من جهة، عندك قرارات صارمة للفئة إلي تستهدف فيهم فورتنايت ومن جهة أخرى نسخة فورتنايت في الصين مصنصرة (من بكري ما سمعناهاش هالكلمة) يعني فما برشا خطوط حمراء خلات مطوّر الألعاب يبدّل في اللعبة وعملية الشراء إلي تصير داخل اللعبة وإلي تمثّل مصدر رزق (+5 مليار دولار في 2020) ما تصيرش بسبب القيود إلي فارضتهم الحكومة الصينية.
كهو، ما بقى لآبيك كان تخرج من سوق ما نجمتش تكمّل فيه.
فورتنايت وحده من مئات الشركات الأمريكية إلي تقهرت في السوق الصينية كيف أمازون، قوقل، ياهو، ميكروسوفت ومؤخّرا لينكدين… أما زعمة تيسلا مازالت مطوّلة غادي؟
المصادر:
