نهارين قبل الإكتتاب في البورصة، العملاق الأوروبي OVH يتعرّض لحادثة جديدة، والمرة هذي خطأ بشري يوقّف ملايين المواقع عن العمل.
كان تتذكرو في 10 مارس 2021 صار حريق هايل في واحد من أكبر داتا سانترز لـ OVH في ستراسبورغ وين 3.6 مليون موقع تعطلو عن العمل لأيام.
اثنين من جملة أربعة داتا سانترز تحرقو بالكامل وضاعت معاهم البيانات، والاثنين الأخرين قدرو إنهم يمنعوهم. 10 أيام بعدها، حريق آخر في نفس البلاصة يتعاود، لكن المرة هذي بدون أضرار تذكر والأسباب مازالت مجهولة رغم إلي تكتب في المواقع الإلكترونية إنو السبب محوّل كهربائي مهلوك
بعد الحادثة هذي، صار جدل كبير خاطر الحرفاء فاقوا باللي بياناتهم ضاعت بالكامل وباللي موقع الإستضافة ما يقدملهمش خدمة باك آب (الاحتفاظ بنسخة قديمة من الموقع والبيانات). هو تقنيا فما السرفيس هذا لكنو بالفلوس، وعلى ذاكا كتعويض للخسائر، خرج أوكتاف كلابا، واحد من مؤسسي الشركة، وأبلغ الحرفاء باللي OVHCloud Disaster Recovery باش يولي مجاني للناس الكل.
بعد الحادثة هذي، تم تأجيل الاكتتاب العام في البورصة (أهم سبب يخلي الشركات تدخل للبورصة هي زيادة حجم التمويل باش يكبر راس المال) وتأجل لـ 15 أكتوبر. وقبل الموعد، حصل ما لم يكن في الحسبان.
نهار 13 أكتوبر 2021، برشا مواقع طاحو وماعادش تنجم تدخللهم والسبب خطأ في الإعدادات وين تقني غلط باش ينسخ إعدادات الراوتر الجديد. أوكتاف كالعادة خرج وفسّر المشكلة إلي صارت في تويت وبعد ساعة ونصف تحلّت المشكلة.
حادثة كيف هذي قبل بنهارين من الدخول للبورصة كانت تنجم تنعكس سلبا على الشركة، لكن المستثمرين عطاو ثقتهم فيها وفي مهمتها إنها تكون الشركة الأوروبية الأقوى إلي تقدّم خدمات الكلاود وتنافس عمالقة التاكْ متاع السيليكون فالي. وهكا دخلت OVH للبورصة بنجاح بسعر قرابة 20 أورو للسهم ويتوقّع إنو يصير نمو بنسبة 25% سنويا.
