ولو إنو النصف الأول من أكتوبر 2021 ما كانش باهي لبرشا شركات تقنية، إلاّ إنو الأسبوع الثاني باش يكون حاسم !
هيا شدو عندكم، الجمعة هذي هي جمعة المواعيد التقنية بامتياز مع أكبر الشركات وفي البرنامج:
الاثنين 18 أكتوبر 2021 :
الشركة التفاحة إستدعات الصحفيين لموعد خاص والإشاعات تقول باللي باش يكون يخص الجيل الجديد من الحواسيب Mac
الثلاثاء 19 أكتوبر 2021 :
قوقل أعلنت على keynote إلي باش تقدّم فيها Pixel 6 وإلي هو سمارت فون منتظر ومن المتوقع يكون فما تحديثات كبيرة خاصة وإنو الهاتف هذا مشهور بقوة الكاميرا متاعو قدام بقية المنافسين.
تسريبات الخصائص التقنية للهاتف الجديد موجودة عالأنترنات، لكن فما إشاعة تقول باللي قوقل باش تخرّج هاتف جديد بالشراكة مع سامسونق Pixel Fold
الاربعاء 20 أكتوبر 2021 :
Samsung باش تقدّم الجزء الثاني من أكبر مواعيدها السنوية Galaxy Unpacked (الجزء الأول كان في أوت 2021). والإشاعات تقول باللي ممكن يصير تقديم Galaxy S21 FE وحتى تقديم ألوان جديدة للهواتف المطروحة.
الخميس 21 أكتوبر 2021 :
من مدة تحارب في الصعوبات إلي فرضتها القيود الأمريكية، Huawei باش ترجع للسباق بمنتوج جديد من سلسلة هواتف Nova.
وفي نفس الإطار هذا Sony هي زادا باش تقدّم السمارتفون الجديد Xperia.
الجمعة 22 أكتوبر 2021 :
Samsung ترجع في آخر الأسبوع لكن مع موعد يخص مطوري البرامج باش يحكيو أكثر على آخر التحديثات الجديدة.
ملاحظة صغيرة نحب نحكي عليها فيما يخص تعامل الشركات مع الإشاعات والتسريبات:
آبل تحرص من تقليل التسريبات إلي تصير على ذاكا ما تستدعى الصحفيين للكينوتس إلي تعملهم كان في آخر دقيقة.
قوقل، تقريبا تنجم تعرف كل شي قبل بفترة والتسريبات عندهم أقوى، على ذاكا ولاو يخرجو صورة للمنتوج متاعهم قبل بفترة وبعدها يبداو في التسويق ليه عبر الفيديوات والإشهارات.
