بعدو بعامين، في 2002، نلقاو « إيلون ماسك » دخل للمجال هذا بشركة SpaceX. ماسك، على عكس بيزوس، يشوف باللي الأرض اليوم وإلا غدوة باش تندثر: يا بنيزك يدمّرها يا بالاحتباس الحراري والمشاكل البيئية إلي متسبب فيها البشر على ذاكا لازم يبعث البشر لكواكب أخرى. ومن بين الطرق إلي تنجم تخلي إرسال البشر لمارس بالتحديد أقل تكلفة هو الصاروخ قابل لإعادة الإستعمال. ونجح ماسك في 2009 بعد عدة سلاسل متاع فشل في التحدي هذا.

في الفترة هذي، بيزوس كان يخدم على نفس الفكرة وحس بالي ماسك ينجّم يغلبو في السباق حول الفضاء، على ذاكا مشى سجل « إعادة إستعمال الصاروخ » كبراءة إختراع باسم الشركة متاعو (في الحالة هذي، كل ما ينجح ماسك في العملية هذي يكون مطالب باش يخلص بيزوس). ماسك بالطبيعة ما سكتش ووقف قدّام اللجنة وقاللهم باللي الفكرة هذي حكاو عليها برشا علماء وموجودة حتى في فيلم روسي… ياخي اللجنة سحبت براءة الإختراع من بيزوس.

خلاف هذا، ماسك مشى لناسا وطلب منها باش يكري من عندهم منصة إطلاق الصواريخ إلي ليها سنين ما تخدمش وصيانتها تتكلّف عليهم برشا، ياخي كراوهالو على 20سنة وبيزوس ما نجّمش يطعن في القرار هذا.

وبعد النجاحات إلي عرفتها SpaceX، ناسا قررت إنها تتعاقد معاها باش تقوم بمهمة توصيل رواد الفضاء لمحطة الفضاء الدولية International Space Station: ISS الشي إلي ما عجبش بيزوس وقعد أكثر من 5 سنين يحظّر في استقالتو من أمازون إلي تمّت نهار 5 جويلية 2021 والظاهر إنو باش يركّز مع مشاريع الفضاء. هذا وأعلن باللي نهار 20 جويلية باش يكون ضمن الطاقم إلي باش يدشّن رحلات السياحة الفضائية، ياخي حدث ما لم يكن في الحسبان.