مايكروسوفت قرّرت أخيرا إنها تتخلّى على متصفحها التاريخي internet Explorer وماعادش تسيبورتيه بداية من 15 جوان 2022.

حد ما ينجّم ينكر الدور إلي قامت بيه مايكروسوفت في أواخر التسعينات باش تنافس Netscape وتقضي عليه بمتصفحها IE (كنت حكيت على القصة بالتفصيل) لكن، في ظل المنافسة الحالية والنسبة الصغيرة برشا لمستعملي المتصفّح هذا مقارنة بتكاليف صيانة الثغرات إلي فيه، مايكروسوفت قرّرت إنها تتخلّى عليه وتركّز أكثر على تطوير المتصفّح Edge إلي تلانصى في 2019.

وأكدت مايكروسوفت بإنو التخلي على IE باش يكون تدريجيا من خلال تعويضو بـ Edge في تحديثات Windows 10 – 20H2 ولمستعملي ويندووز 8.1 أو 7 (مش محبّذ استعمالو خاطر مايكروسوفت ماعادش تسيبورتيه وتحدّث فيه) باش يقعدوا ينجموا يستعملوه وبالطبيعة يتحملوا مسؤوليتهم.

وللتذكير، بإنو فما خاصية في Edge تخليك تحوّلو لـ IE من خلال صفحة الإعدادات.