شخصيات عامة، بنوك، مستشفيات، مدارس، مواقع حكومية، ساعات ذكية، ساكس تويز، محاكم ومحامين… هاذم المجالات إلي تعرضوا للجرائم الإلكترونية العام إلي فات، والقايمة مازالت باش تطوال !

بعد ما كنت حكيتلكم قبل على استهداف قطاعات حيوية كيف المستشفيات في عمليات القرصنة، نحكيو اليوم على استهداف شركة توزيع الوقود وشلّها بسبب ransomware.

Colonial Pipeline شركة توفّر خطوط أنانبيب لتوزيع الوقود في أمريكا، تلقى روحها فجأة ضحيّة من ضحايا مجموعة القراصنة الروس Darkside ، بمعلومات تقدّر بـ 100Go مسروقة ومشفّرة وبفدية كبيرة لازم تدفعها.

كحل سريع وبديهي، الشركة وقّفت التوزيع في الأنابيب الرئيسية ووقّفت السيستام وكلّفت شركة مختصة في الحماية الرقمية باش يثبتوا في إلي صار.

حادثة كيف هذي تعتبر مهمة وخطيرة خاطر الشركة هذي معنية بتوزيع 45% من الوقود في الجانب الشرقي لأمريكا آش خلاهم يعلنوا في حالة طوارئ في 17 ولاية والبيت الأبيض مع الحكومة الفيديرالية قاعدين يشوفوا في أنجع الحلول باش يتجنبوا إضطرابات التوزيع وما ينجرّ عليه من مشاكل خاصة إقتصادية.