نهار الاثنين 3 ماي 2021 بدات جلسات الإستماع في قضية القرن بين الماركة التفاحة Apple والشركة إلي عندها أشهر لعبة Fortnite by Epic Games.
- ما قبل المحاكمة
Fortnite هي لعبة مجانية تنجم اتاليشرجيها من AppStore أو PlayStore لكن في وسط اللعبة تنجم تشري (بالفلوس الحقيقية) أكسيسوارات يساعدوك باش تقدّم في اللعبة. عمليّة الشراء تكون عن طريق نظام من عند آب ستور أو بلاي ستور باش يأمنو ويحميو المعاملة هذي، وفي المقابل ياخذو عليها عمولة محدّدة بـ 30% من قيمة الحاجة إلي شريتها.
Epic Games اقترحت نظام موازي للدفع وفيه أسعار أقل من الأسعار الموجودة في الستور وهكاكا تربح أكا 30% إلي كانت تسلّم فيهم لڨوڨل وآبل. وفي حجتها على إلي عملتو، Epic قالت باللي اللاعبين ينجموا يستمتعوا بأكسيسوارات مش غالية برشا لولا نظام الـ 30%.
وللمعلومة، أي تطبيق تشريه من آب ستور أو بلاي ستور أو أي عمليّة شراء تقوم بيها في وسط أي تطبيق، صاحب التطبيق لازمو يدفع الـ 30% لمولى الستور وبرشا مطورين تشكاوْ من المبلغ وعبّروا على استيائهم وباللي آبل وڨوڨل يستغلوا في موقعهم باش يقمعوا المنافسة ويتحكموا أكثر في الإيكوسيستام الموجود.
نهار 13 أوت 2020، آبل قرّرت تنحّي اللعبة من آب ستور بسبب نظام الخلاص الموازي وبعدها بنهار ڨوڨل خذات نفس القرار وفسخت اللعبة من بلاي ستور.
Epic Games كانت محظرة روحها : من الناحية القانونية رفعت قضايا ضدّ ڨوڨل وآبل نصف ساعة بعد قرار حذف اللعبة من الستور وأهم حجة كانت استغلال النفوذ للاحتكار. ومن الناحية الإعلامية Epic عملت فيديو على شكل محاكاة ساخرة من إشهار تاريخي لآبل عام 1980 ولانصات هاشتاغ #freeFortnite إلي لقى رواج كبير. الدعاية الإعلامية خلات برشا مطورين وشركات معروفة تساند آبيك في معركتها كيف Spotify, Tinder, ProtonMail, Microsoft…
يقول القايل علاش آبل مستهدفة أكثر من قوقل؟
على خاطر في نظام أندرويد، كان ما تلقاش التطبيق في PlayStore تنجم اتاليشرجيه apk وتنستاليه وحدك، الشي إلي ما تنجمش تعملو في نظام iOS. خلاف هذا، معايير قبول التطبيق في AppStore أصعب بياسر على خاطر آبل تركّز في تصريحاتها على الحماية وخاصة حماية المعطيات الشخصية.
- ما قبل جلسات الاستماع
كيف ما قلنا Epic مركزة في حججها على استغلال النفوذ وقتل المنافسة، ومن جهتها آبل حظرت حجج من نوع :
- AppStore مهم في سوق التطبيقات وساعد في خلق برشا فرص للمطورين
- أغلبية التطبيقات الموجودة في المتجر مجانية، يعني آبل مش ديما تاخذ في 30%
- المطورين عندهم حرية بيع تطبيقاتهم في متاجر أخرين كيف بلاي ستور، مايكروسوفت ستور، بلايستايشن ستور وغيرو…
- Epic تحظر من 2019 باش تخرّج آبل في صورة الشرير كيف كلّفت بيرو محاماة معروف باش يتلهى بالملف هذا تحت عنوان Project Liberty
وخلاف هذا، في ديسمبر 2020 أعلنت آبل باللي الـ 30% باش تولي 15% للمطورين إلي يدخلوا في راس مال من التطبيق أقل من 1مليون دولار.
3. جلسات الإستماع
امتدّت جلسات الاستماع على 3 أسابيع، من 3 ماي 2021 إلى 21 ماي 2021 وين طلبت فيهم المحكمة الحضور الشخصي لكلّ الأطراف المعنيّة في المحكمة رغم أزمة الكوفيد. من بين الحاضرين كان موجود في الأسبوع الأول تيم سويني (لتمثيل آبيك قايمز) وفي الأسبوع الثالث حضر تيم كوك (لتمثيل آبل). برشا ملفات ووثائق تناقشت طيلة الأسابيع الثلاث ومن بين الوثائق إلي تقدمت مجموعة رسائل بريدية داخلية تابعة لآبل تبيّن اهتمامها بأكثر التطبيقات المطلوبة كيف فايسبوك، ناتفليكس… وببعض المفاوضات إلي صاروا مع Fortnite وكيفاش تفاهموا باش تكون اللعبة موجودة في الصفحة الرئيسية من المتجر.
من بين الحاجات إلي تكشفت هي حكاية Netflix عام 2018 وقت إلي قرّرت إنها تنحّي عملية التسجيل في السرفيس متاعها من خلال تطبيق الهاتف خاطرها ماهيش تربح في المشتركين. آبل وقتها عملت المستحيل باش تمنع الشي هذا واقترحت على ناتفليكس برشا مميزات… وهذا الكل بالطبيعة قبل ما يتلانصا سرفيس Apple TV.
عدم المفاهمة بين Facebook وآبل مش جديدة، كنت حكيت سابقا على استياء فايسبوك من التحديث الجديد في iOS14 لكن من 2011 بدات المعاناة الحقيقية لفايسبوك مع التفاحة وإلي خرجت في حجج الاتهام. في 2011 تطبيق فايسبوك على iPad كان فيه منفذ باش تلعب ألعاب على الويب في عوض ما تنستاليها من AppStore الشي إلي ماكانش يرضي آبل وما توصلوش لحل وسط. وحتى في 2016 وقت إلي زادت فايسبوك بعض الألعاب في ماسنجر، كان لازم عليها تستنى برشا باش تحصل الموافقة من عند آبل « كيفهم كي غيرهم ». وآخرها في 2020 أجّل فايسبوك تطبيقو الجديد Facebook Gaming وإلي تعطّل بسبب المستنية والموافقة من عند آبل واضطروا إنهم ينحّيو بعض الوظائف من نسخة iOS على ذاكا تجربة السرفيس هذا على أندرويد خير بياسر.
Microsoft هي زادا عندها حكاية مع آبل ظهرت في إيمايلوات من 2012 وقتها دعاتها آبل باش تخرّج نسخة من MS. Office متوافقة مع نظام iOS. مايكروسوفت كان عندها 2 شروط : الأول تخليهم آبل يحولوا عمليات الدفع على موقعهم وما يدفعوش اكا الـ 30% والثاني يتلاقاو مع المديرين التنفيذيين لآبل باش يتفاهموا على عمليات الدفع… والمفاوضات فشلت وما خرج الأوفيس على آيبادْ كان في 2014
في 2015 بدات آبل تروج للعبة Fornite وقدمتها في مؤتمرها السنوي WWDC ولحتى سنة 2020 كان الشراكة بين آبل وآبيك قايمز كالزيت فوق الماء، الزوز شركات يلوجوا على المصلحة المشتركة، اللعبة قاعدة تنتشر وادخّل في برشا فلوس واللاعبين إلي جايين مالإيكوسيستام آبل يزيد. في 2019، فما إيمايل يحكي على حفلة موسيقية باش تصير في Fortnite وباش يكون حاضر فيها ال Dj Marshmello. آبل قالتلهم باللي لازم الحفلة تكون بلاش كلام زايد، واقترحت عليهم شراكة مع Apple music والترويج للحفلة بالإشهارات في أكبر مدن أمريكا. ومن هنا بدا خوف بعض موظفي آبيك من إنو آبل تولي تتحكم في كل الأحداث إلي تقررها Epic، والتشكيات من ال 30% قعدت متواصلة لين صار إلي صار.
بعد 3 أسابيع محاكمة نلخّص أهم النقاط إلي تحكاوْ فيهم :
- الحديث حول Minecraft و Roblox هل هوما ألعاب أو تطبيق متعدّد العوالم metaverses (وين يصير دمج الواقع بعالم اللعبة واللاعب يتفاعل مع العالم الجديد من خلال الأفلام، حفلات الموسيقى، وتجارب أخرى…). وتم الإتفاق على إنو Minecraft لعبة لكن Roblox كيفها كيف Fortnite لعبة متعدّدة العوالم وعلى ذاكا قانون عمولة 30% لازم يتراجع. وبالنسبة لـ Roblox وباش تقعد في متجر AppStore اضطرت إنها تحذف كلمة « لعبة » من الموقع الرسمي ليها وتبدّل البراند متاعها.
- قانون « منع التوجيه » إلي حطتو آبل باش تمنع أي تطبيق من إنو يوجّه المستعمل لأي موقع خارج التطبيق أو المتجر باش يخلّص أو يقوم بعمليّة معيّنة. وهنا المحامي متاع آبيك استعمل مثال للعبة قدّمتها هيئة الدفاع لآبل وهي Candy crush وبيّن للمحكمة كيفاش ينجم المستعمل يضيع بالتوجيهات إلي تفرضها آبل.
- هيئة دفاع آبل بيّنت باللي هي متحكّمة في كل تطبيقات iPhone (على عكس iMac وهنا كانت المفاجأة) والتحكّم هذا هو إلي يخليه نظام محمي وآمن. وهنا تم الحديث على متجر itch.io إلي تنجم تستعملو باش تهبط منو تطبيقات من غير مراقبة محتوى البالغين. ومن بين الطرايف إلي صاروا، آبل اتّهمت آبيك باللي هوما عندهم محتوى غير لائق (الموزة بيلي بدون ملابس) ياخي الموزة جات بملابسها الرسمي قدام قاعة المحكمة.
صحيح الجلسة رفعت من غير حكم نهائي، لكن برشا يرجّحوا باللي آبل تنجّم تربح القضية خاطر من أصلو ما فماش قضيّة والدفاع كان شرس في الحجج إلي قدّمها، لكن برشا أخرين يرجّحوا باللي القاضية تنجم تحكم لآبيك خاصة وإنو محامي آبيك حط تيم كوك في مواقف محرجة خلاتو ما يجاوبش أو يتهرّب من برشا أسئلة وينفي معرفتو ببعض التفاصيل، الحاجة إلي تنجّم تضرب مصداقية آبل عند المستعملين متاعها.
وقبل ما تختم الجلسة الأخيرة، القاضية سئلت تيم كوك إذا كان يحب ألعاب الفيديو أو لا؟ قاللها لا.
في انتظار حكم المحكمة بعد أسابيع أو أشهر، إصرار آبيك قايمز إنها تخوض الحرب هذي ينجّم يبدّل برشا معطيات في المستقبل.
