موقع التواصل الإجتماعي Reddit هو زادا انضم لبقية منافسي Clubhouse وقدّم منتوج جديد باسم Reddit Talk. وحسب التصاور المنشورة، التطبيق حتى في الديزاين متاعو، مُستوحى برشا من ديزاين Clubhouse.

النقطة إلي خدم عليها Reddit هو أكثر كنترول على غرف المحادثات، على ذاكا في مرحلة أولى عملوا ليستا متاع مشرفين باش يجربوا البروداكت الجديد ويلانصيو المحادثات وهوما نفسهم ينجموا يستدعاو أعضاء فاعلين في Reddit وموثوقين باش تتمّ النقاشات بكل اعتدال. ولو فما عضو قلقهم بحديثو، فما إمكانية البلوك !

النقطة الأخرى، هو إنو التطبيق متاح على أندرويد وآيفون ويظهرلي ما فماش منافس لـ Clubhouse ما خذاش النقطة هذي بعين الإعتبار.

وللتذكير، Reddit من وقت ما تلانصا في 2015 وهو يجرّب في حاجات جديدة باش يفكّ بلاصتو بين مواقع التواصل الإجتماعي، وفي ديسمبر 2020 شرى Dubsmash المختصة في التعديل على الفيديوات باش ينافس TikTok.