محبّي التفاحة كان عندهم موعد نهار 20 أفريل مع Keynote جديدة وين تمّ الإعلان على منتوجات آبل الجديدة :
اللون البنفسجي الجديد للآيفون 12 وإلي باش يكونوا متوفرين بداية من 30 أفريل.
Airtags
أخيرا وبعد انتظار طويل وبعد ما برشا مصنّعين كيف ساسمونق كان قدّم SmartTag وكنت حكيت عليه الموضوع SmartTag by Samsung is here، اليوم آبل تبدى في تسويق Airtag. الأكسيسوار هذا تنجم تركبوا في حاملة المفاتيح، الهاتف، حيوان أليف، حقيبة سفر… باش في حالة ما تنساه أو يضيع تلقاه بسهولة. ومع الجانب التقني، نلقاو الجانب الإيكولوجي للأكسيسوار هذا المصنوع من القصدير المرسكل 100% وخالي من المواد المضرّة والشارج قويّة.
iPad Pro
جاء الدور على iPad باش تولّي فيه SoC الجديدة متاع آبل إلي استعملتها في MacBook و iMac (وإلي خلاتها تتخلى على شراكتها مع Intel). وإلي يقول puce M1 يقول أكثر قوّة، جرافيك أقوى واستهلاك طاقة أقل. إضافة التابلات موالمة للـ 5ج وشاشتها مصنوعة بتقنية mini-Led. وعلى خاطرها Pro، سعة التخزين تنجم توصل لـ 2To – SSD.
iMac
إلي يقول Mac تجي في مخو طول صورة الحاسوب الرمادي، لكن تو باش تولّي قطيعة مع الصورة النمطية هذي على خاطر آبل قدّمت تصميم جديد لحواسيبها وبرشا ألوان وقوة ال puce M1 حاضرة. الشاشة تجي بدقة 4.5K وبحجم 24 إنش. نلقاو 6 مكبرات صوت باش تعيش تجربة Spatial audio (موجودة في airPods وإلي تخليك تحس بالصوت في حيز مكاني كيف قاعة السينما). بالطبيعة الكاميرا لازمة على ذاكا تلقاوها بدقة HD Facetime 1080p. والجديد في keyboard المصاحب، آبل زادت فيه TouchID كيف الآيفون باش تولي تحل حاسوبك بلمسة إصبع.
