« برشا ناس باش يخسروا خدمهم جرّة الذكاء الإصطناعي » 

نعرّفكم على المؤثرة، كاتبة أغاني وال دي دجا : Reah Keem إلي تنجموا تسمعوا غناها على الساوند كلاود واتبعوها على Instagram..

ريا كان ليها الشرف إنها تقدّم بعض المنتجات متاع LG في أهم حدث عالمي سنوي يخصّ المستجدات التقنية والاعلامية CES وإلي، ومش غريب عليكم، السنة كان افتراضي.

حتى هنا الخبر عادي… أما إلي نحب نقولهولكم باللي ريا مخلوقة 100% من الذكاء الاصطناعي وهي بيدها منتوج جديد للشركة الكورية LG إلي من رايي سجلت نقطة مهمّة في طريقة تقديمها للمنتوج هذا. 

إلي يتبّع CES كل عام تنجم يكون الخبر عادي بالنسبة ليه خاطر سبق وقدمت سامسونق في CES 2020

البروجا متاعها Neon المتمثل في ناس افتراضيين، كل واحد وشخصيتو، لبستو، ذكرياتو، مواقفو… وينجم يكون مساعد شخصي. نبسّط الحكاية أكثر، تقولش عليك تحكي مع شات بوتْ لكن الإجابة تكون في شكل شخص كاينو حقيقي. البروجا هذا يولي متاح في الهواتف الذكية في 2022.

وللمعلومة، كوريا الجنوبية حقيقة نعتبرها رائدة في المجال هذا متاع خلق ناس افتراضيين لهدف معيّن وكانوا قدموا مثال لنسخة افتراضية من المذيعة الحقيقية إلي تنجّم تعوضها في قراءة الأخبار كي تبدى الحقيقية مش موجودة.