علاش Twitter مزروبين باش يجربوا الفازة الجديدة متاعهم Spaces ؟
Spaces هي خاصية جديدة تتمثل في غرف محادثات بالصوت مسجلين فيها حاليا 1000 مستعمل إلي طلب منهم تويتر نهارين لتالي يتاستيوها باش يشوفوا فاعليتها.
الخطوة السريعة هذي نرجّح إنو تويتر مشى فيها بعد ما شاف النجاح إلي قاعد يحقق فيه تطبيق ClubHouse.
ClubHouse هو سوشل ميديا جديد بدى في مارس 2020 ووصل اليوم لقرابة 2 ملاين مستعمل وقيمة تتجاوز المليار دولار. المسؤولين على تطويرو ولاد السيليكون فالي والتطبيق ستار وبرشا يتوقعوا إنو باش ياخو بلاصة مميزة في المستقبل.
شنوا الجديد في ClubHouse ؟
الجديد إنو ما فماش منشورات ورياكشنز، ما فما كان محادثات جماعية بالصوت، الغرفة تنجم تهز 5000 مستعمل، تنجم تاخو الكلمة في أي وقت والغرف منظمين حسب المواضيع. خلاف هذا، ما تنجم تسجل فيه كان ما يجيك إستدعاء من مستعمل والتطبيق ماهو موجود كان عالـ iOS وكان حد يسينياليك (يبلغ عليك إدارة الموقع) خاطرك قلت حاجة مش في بلاصتها، إلي استدعاك يتأثر زادا بالسينيال، على ذاكا قبل ما تختار شكون 2 إلي تنجم تستدعاهم لازمك تفكّر مليح !
إليون، ماسك، أوبرا، درايك… وبرشا مشاهير موجودين فيه والصين منعت التطبيق هذا نهار 8 فيفري خاطر برشا صينيين دخلوا يحكيو ويتناقشوا في السياسة وخاصة في الأحداث إلي صايرة من مدة في هونغ كونغ.
ClubHouse ممكن تكون فوعة وتتعدّى كيف برشا مواقع وتطبيقات، كيف ما تنجم تكون ظاهر تزعزع موازين قوى مواقع التواصل الإجتماعي.
The original article was posted on LinkedIn
